बुटवल । प्रगतिशील पत्रकार सङ्घ, रुपन्देहीले नेपाल पत्रकार महासङ्घको सदस्यता वितरणमा राजनीतिक पूर्वाग्रही देखिएको बताएको छ ।
२०८० साउन १० गते बुधबार प्रगतिशील पत्रकार सङ्घ, रुपन्देहीका सचिव टेकराज भुसालले नेपाल पत्रकार महासङ्घ रुपन्देहीको कार्यालयमै पुगेर यस्तो दाबी गर्नुभएको हो ।
सचिव भुसालले कार्यालयबाटै लुम्बिनी प्रदेश र केन्द्रीय समितिलाई मेलमार्फत ध्यानाकर्षणपत्र बुझाउँदै महासङ्घले राजनीतिक पूर्वाग्रही गरी नयाँ सदस्यता वितरण गरेकोमा सङ्गठनको विमति रहेको जनाउनुभयो ।
उहाँले उक्त विभेदपूर्ण निर्णयलाई सच्चाउँदै महासङ्घको सदस्यता प्राप्त गर्न बञ्चित भएका वास्तविक पत्रकारलाई सदस्य प्रदान गर्न र गैरपत्रकारको नाम सिफारिस नगर्न ध्यानाकर्षण गराउनुभयो ।
नेपाल पत्रकार महासङ्घ रुपन्देहीको बैठकले ३२ जनालाई नयाँ सदस्यता दिने निर्णय गरेको थियो । महासङ्घले गरेको उक्त निर्णयमा कतिपय मापदण्डभित्र पर्नेलाई पनि राजनीतिक पूर्वाग्रहीका कारणले गर्दा सदस्यता नदिएको र कतिपय मापदण्डभन्दा बाहिरका व्यक्तिलाई समेत सदस्यता दिएको भन्दै उक्त निर्णय सच्चाएर वास्तविक पत्रकारलाई सदस्यता दिनुपर्नेमा प्रगतिशीलले जोड दिएको छ।
सचिव भुसालले सङ्गठनले पत्रकार महासङ्घको गरिमालाई थप उचो बनाउन र श्रमजीवी पत्रकारको पक्षमा निरन्तर वकालत गरी पछिल्लो समयमा महासङ्घले चलाएको सदस्यता शुद्वीकरण अभियानमा समेत साथ दिँदै आएको थियो तर नयाँ सदस्यता वितरण गर्दा महासङ्घले मापदण्डअनुसार नभई कुनै पनि आस्था र विचारका आधारमा वितरण गरेकाले यस्तो निर्णयले पत्रकार महासङ्घमाथि नै प्रश्नचिह्न खडा भएको बताउनुभयो ।
