काठमाडौँ । छ कम्युनिस्ट पार्टीनिकट किसान सङ्गठनहरूले भारतको नयाँ संसद् भवनमा राखिएको कथित अखण्ड भारत नक्साबाट नेपालका तीर्थस्थलहरू लुम्बिनी र कपिलवस्तु तत्काल हटाउन माग गरेको छ ।
२०८० जेठ २० गते शनिबार संयुक्त प्रेसवक्तव्य जारी गर्दै उनीहरूले यस विषयमा नेपाल सरकारसित स्पष्ट दृष्टिकोणसमेत माग गरेका छन् ।
देशको सार्वभौमिकता, स्वाधीनता र स्वतन्त्रताको रक्षा गर्न सरकारसित माग गर्दै अन्यथा आन्दोलन अगाडि बढाउने चेतावनी दिइएको प्रेसवक्तव्यको पूर्ण पाठ यस्तो छ :
“भारतको नयाँ संसद् भवनको भित्तामा विश्व सम्पदा सूचीमा समावेश भएका नेपालका प्रसिद्ध तथा ऐतिहासिक तीर्थस्थलहरू लुम्बिनी र कपिलवस्तुसमेत समेटिएको ‘अखण्ड भारत’ नामको भित्तेचित्र (मुरल) अङ्कित गरेको यस संवेदनशील विषयलाई हामी नेपालका ६ कम्युनिस्ट पार्टीनिकट किसान सङ्गठनले अत्यन्तै गम्भीर रूपमा लिएका छौँ ।
भारत सरकारको यस कदमले नेपालको सार्वभौमिक अखण्डता, राष्ट्रिय स्वाधीनता तथा नेपालको स्वाभिमानमाथि अपूर्व आँच पुर्याएकाले यसप्रति घोर आपत्ति जनाउँदै तीव्र विरोध गर्दछौं । हामी भारत सरकारलाई त्यो भित्तेचित्रबाट नेपालका गौरवमय स्थलहरू लुम्बिनी र कपिलवस्तुसहितको नेपाली भूमि तत्काल हटाई नेपालको सार्वभौमिक अखण्डता, स्वाधीनता र स्वतन्त्रताको सम्मान गर्न जोडदार माग गर्दछौं ।
यस विषयमा आफ्नो प्रष्ट दृष्टिकोण जनसमक्ष सार्वजनिक गर्न र देशको सार्वभौमिक अखण्डता, राष्ट्रिय स्वाधीनता र स्वतन्त्रताको रक्षा गर्ने दृढता प्रदर्शन गर्नका लागि नेपाल सरकारसमक्ष समेत जोडदार आग्रह गर्दछौँ अन्यथा हामी राष्ट्रिय सार्वभौमिकताको यो प्रश्नमा समेत किसान आन्दोलनलाई अघि बढाउन बाध्य हुने कुरा प्रष्ट पार्दछौँ ।”
प्रेसवक्तव्यमा अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी केन्द्र) का अध्यक्ष चित्रबहादुर श्रेष्ठ, अखिल नेपाल किसान महासङ्घका अध्यक्ष बलराम बासकोटा, अखिल नेपाल किसान महासङ्घ (क्रान्तिकारी) का अध्यक्ष सीताराम तामाङ, अखिल नेपाल किसान यूनियनका इन्चार्ज लोकनारायण सुवेदी र अखिल नेपाल प्रगतिशील किसान सङ्घका अध्यक्ष दुर्गाप्रसाद जैसीको हस्ताक्षर रहेको छ ।
