दाङ, तुलसीपुर । दाङमा लेलिन जयन्ती तथा नेपाल कम्युनिस्ट पार्टीको स्थापनाको हिरक जयन्ती कार्यक्रम सम्पन्न भएको छ ।
नेपाल कम्युनिस्ट पार्टी (मसाल) जिल्ला समिति दाङको आयोजनामा शनिवार तुलसीपुरमा सम्पन्न कार्यक्रमलाई सम्बोधन गर्दै नेकपा (मसाल) का दाङ जिल्ला प्रवक्ता भरत भण्डारीले नेपालमा विचार, विज्ञान र दर्शन धेरै कमजोर बनेको बताउँदै खास गरि युवाशक्ति सीघ्रलाभ र उपरिप्रकारको बहकाउमा लागेको बताउनु भयो ।
उहाँले अहिलेको व्यबस्था बदल्नका लागि लेनिनका विचारहरू मार्गदर्शनका रूपमा रहेको बताउँदै अहिले पनि लेलिनका विचारहरू जनताको अबस्था बदल्नका लागि हतियारको रूपमा रहेको दाबी गर्नु भयो ।
कार्यक्रममा अखिल नेपाल युवक संघका पूर्वकेन्द्रीय अध्यक्ष काशिनाथ पोख्रेलले २००६ सालमा चार जनाले स्थापना गरेको नेपाल कम्युनिस्ट पार्टीका पक्षमा अहिले दुईतिहाई भन्दा धेरै जनमत रहेको बताउँदै कम्युनिष्ट आन्दोलनमा पैदा भएको अवसरवादका कारण नेपाली कम्युनिस्ट आन्दोलन रक्षात्मक अबस्थामा रहेको बताउनु भयो ।
कम्युनिस्ट आन्दोलन शोषण, दमन, अन्याय अत्याचारका विरूद्ध संगठित भएको आन्दोलन भएकाले यसलाई कसैले चाहेर पनि समाप्त गर्न नसक्ने बताउनु भयो ।
कार्यक्रममा राष्ट्रिय जनमोर्चाका केन्द्रीय सदस्य कमला जिसि,राष्ट्रिय जनमोर्चा दाङ जिल्ला अध्यक्ष तथा वैकल्पिक केन्द्रीय सदस्य गणेश आचार्य, प्रगतिशील पत्रकार संघ, नेपालका केन्द्रीय सल्लाहकार ईश्वरी भण्डारीले कार्यक्रममा आफ्ना विचार राख्नु भएको थियो । कार्यक्रम शुक्रराज भण्डारीले सञ्चालन गर्नु भएको थियो ।
