काठमाडौँ । अमेरिकी राष्ट्रपति जो बाइडेनले हाल सरदर ४७ हजार डलर पाउँछन् तर चितवन–२ उपनिर्वाचनका उम्मेदवार रवि लामिछानेले आफूले मासिक एक लाख डलर पाउथेँ भनी दाबी गरेपछि अमेरिकाकै नेपालीले त्यसको खण्डन गरेका छन् ।
जनआस्थाका अनुसार नेपालमा पत्रकारिता गर्दागर्दै अमेरिका पुगेका नील खड्का र अर्का पत्रकार हरि अधिकारीले आफ्नो कमाइसम्बन्धी लामिछानेको दाबी कुनै हालतमा सही नभएको बताएका हुन् ।
‘अमेरिकी राष्ट्रपति बाइडेनको तलब वार्षिक चार लाख डलर रहेछ । तलबबाहेक अरू सुविधाबापत् उनले वार्षिक थप एक लाख ६९ हजार डलर पाउने रहेछन् । सबै जोड्दा बाइडेनले वार्षिक ५ लाख ६९ हजार डलर पाउने रहेछन् । यो भनेको महिनाको करिब साढे ४७ हजार डलर मात्रै हो । अझ चार लाखको त कर काटिने रहेछ । अमेरिकाको वर्तमान राष्ट्रपतिले समेत तलब र अन्य सबै सुविधावापत महिनाको ५० हजार डलर कमाउँदैनन्’ खड्काले आश्चर्य व्यक्त गर्दै लेखेका छन्– ‘रवि लामिछानेले अमेरिकामा १० वर्षअघि नै महिनाको एक लाख डलर कमाउथे रे ¤?’
खड्काले अगाडि टिप्पणी गरेका छन्– ‘यिनलाई पनि अन्ध समर्थकहरू छँदै छन्, चुनावको बेला जनतालाई जे भने पनि हुन्छ भन्ने भूत चढेछ ।’
रवि जस्तै अमेरिकामा बसेर नेपाल फर्किएका वरिष्ठ लेखक तथा समालोचक हरि अधिकारीले पनि मासिक एक लाख डलर कमाउने लामिछानेको भाषणलाई उट्पट्याङ बताएका छन् ।
‘रविले जोतेको त्यो उट्पट्याङ गफ दिल र दिमाग दुबैलाई विचलित पार्ने खालको थियो’ झन्डै चार वर्ष अमेरिकामा बसेर सन् २०२१ मा नेपाल फर्किएका उनले फेसबुकमा लेखेका छन्– ‘ढिलोचाँडो यस देशको राज्यसत्ता सञ्चालन गरिछाड्छु भन्ने अठोटका साथ राजनीतिको अखाडामा उत्रिएको फूर्तिबाज व्यक्तिले सार्वजनिक रूपमै त्यस्तो सफेद झुट बोलेको सुन्नुपर्दा को पो स्तब्ध नभई रहन सक्ला र ?’
रवि लामिछानेले अमेरिकामा मजदुरी गरेर कमाउने भनेको मासिक अधिकतम चार हजार डलर भएको दाबी गर्दै अधिकारीले अगाडि लेखेका छन्– ‘उनले धेरै दिन सबवे भनिने फास्टफुड आउटलेटमा रोटी पोको पारेका थिए । उनले त्यो काम गरिरहेका बेला उनी बसेको मेरिल्यान्ड राज्यमा प्रतिघण्टा ज्याला १० डलर थियो सायद । महिनाको ३० दिन नै दिनको ८ घण्टा काम गर्ने हो भने महिनाभरिमा सबवेमा काम गर्ने मजदुरले कमाउने भनेको २४ सय डलर हो । ओभरटाइम आदि गर्दा केही सय डलर थप हुन सक्छ ।’
रवि यतिखेर चितवन–२ मा निर्वाचन प्रचार प्रसारमा छन् । त्यस क्रममा उनले अमेरिमा रहँदा आफ्नो तलब मासिक एक लाख डलर रहेको जस्ता भ्रमपूर्ण अभिव्यक्ति दिँदै आएका छन् ।
२०७९ मङ्सिर ४ गतेको निर्वाचनमा सोही क्षेत्रबाट प्रतिनिधि सभा सदस्यमा विजयी भएका रविको सांसद पद सर्वोच्च अदालतले गत माघ १३ गतेको फैसलाद्वारा खारेज भएको थियो । त्यसपछि माघ १५ गते पुन: नेपाली नागरिकता लिएका रविले तीन महिना नपुग्दै चितवनबाट उम्मेदवारी दिएका छन् तर सम्बन्धित निकायले भने रविको यस्तो गैरकानुनी कदमको रक्षा गर्दै आएको छ ।
