खलङ्गा । अखिल नेपाल किसान महासङ्घ (अप्फा) प्युठानको तेस्रो जिल्ला सम्मेलन सम्पन्न भएको छ ।
केन्द्रीय अध्यक्ष भैरवराज रेग्मीको प्रमुख आतिथ्यमा २०७९ चैत २६ गते आइतबार सो कार्यक्रम सम्पन्न भएको हो ।
जिल्ला सम्मेलनको उद्घाटन गर्दै प्रमुख अतिथि रेग्मीले सरकार र देशको राजनीतिले किसानलाई दोस्रो दर्जाको नागरिकसरह व्यवहार गरेको बताउनुभयो ।
उहाँले देशका किसानप्रति यस खालको रवैयाका विरुद्ध देशभरिका किसानले औपचारिक विरोध मात्रै नभएर सरकार र सरकारी संस्थाका विरुद्ध सङ्गठित प्रकारले विरोध कार्यक्रम सञ्चालन गर्नुपर्ने आवश्यकता औल्याउनुभयो ।
सम्बोधनको क्रममा उहाँले देशको अर्थतन्त्रमा २७ प्रतिशत योगदान दिने कृषिक्षेत्रका लागि ३.७ प्रतिशत बजेट छुट्याइएकोमा विरोध गर्नुभयो । उहाँले कृषिबजेटमा वृद्धि गर्न सरकारसित माग गर्नुभयो ।
वि.सं. २०१० सालमा मोहनविक्रम सिंहको नेतृत्वमा प्युठानकै नारिकोटमा प्रसिद्ध किसान आन्दोलन चलेको स्मरण गर्दै उहाँले किसान आन्दोलनको विकासबिना कम्युनिस्ट आन्दोलनको विकास नहुने बताउनुभयो ।
कार्यक्रममा राष्ट्रिय जनमोर्चाका केन्द्रीय सदस्य तथा मल्लरानी गाउँपालिकाका अध्यक्ष कृष्ण खड्का, अखिल नेपाल जनजाति सम्मेलनका महासचिव तथा मल्लरानी गाउँपालिकाका पूर्व अध्यक्ष अमरध्वज राना र राष्ट्रिय जनमोर्चाका लुम्बिनी प्रदेश अध्यक्ष वोमबहादुर खत्रीले मन्तव्य राख्नुभएको थियो ।
सो अवसरमा राजमो केन्द्रीय सदस्य सरिता जिसी, अखिल नेपाल युवक सङ्घका जिल्ला उपाध्यक्ष कुबेर भण्डारी, अखिल नेपाल महिला सङ्घकी जिल्ला उपाध्यक्ष हुमा आचार्य पोखरेल, अप्फाका पूर्व जिल्ला अध्यक्ष राम पहाडी र कर्णबहादुर रायमाझी, वरिष्ठ किसान नेताहरू कर्णबहादुर रायमाझी, तेजबहादुर खड्का, नित्यानन्द आचार्यलगायतको आतिथ्य रहेको थियो ।
कार्यक्रममा पूर्व जिल्ला अध्यक्षहरूलाई सम्मान गरिएको थियो ।
सम्मेलनको उद्घाटन सत्रमा मिनबहादुर केसीको अध्यक्षता, गिरिराज पौडेललको सञ्चालन तथा यामप्रसाद शर्माको सञ्चालन रहेको थियो ।
सम्मेलनको बन्दशत्रमा जिल्ला अध्यक्ष मिनबहादुर केसीले साङ्गठनिक प्रतिवेदन प्रस्तुत गर्नुभएको थियो ।
बन्दशत्रमै अप्फाका केन्द्रीय सचिव वीरबहादुर जिसीले १५ पूर्ण चार वैकल्पिक र पाँच सल्लाहकारसहितको नयाँ समितिको प्यानल प्रस्तुत गर्नुभएको थियो । समितिमा अध्यक्ष गिरिराज पौडेल, उपाध्यक्ष यमप्रसाद शर्मा, सचिव खड्कबहादुर महतारा, सहसचिव नन्दराम पुन र कोषाध्यक्षमा तारा पुरी रहनुभएको छ ।
त्यस्तै, सदस्यहरूमा विष्णु एमसी, मञ्जु एमसी, शोभबहादुर केसी, नित्यानन्द आचार्य, कर्णबहादुर रायमाझी, भक्तबहादुर रुचाल, मोहन बस्नेत, मोहनलाल गोराथोकी र लेखराज शर्मा रहनुभएको छ ।
एवम् प्रकारले सल्लाहकारमा ठाकुर गिरी, तेजबहादुर खड्का, मिनबहादुर केसी र कृष्णराज पौडेल रहनुभएको छ ।
समितिको पूर्ण सदस्य र सल्लाहकारका केही स्थान रिक्त राखिएको छ ।
नवनिर्वाचित समितिलाई अप्फा अध्यक्ष रेग्मी र केन्द्रीय सदस्य धु्रव थापाले बधाई दिनुभएको थियो ।
