बुटवल । राष्ट्रिय जनमोर्चाका अध्यक्ष चित्रबहादुर केसीले राजनीतिमा लागेर फाइदा खोज्नेहरु राजमोमा टिक्न नसक्ने बताउनुभएको छ ।
राजमो सैनामैना नगरको दोस्रो नगर सम्मेलन समापनका अवसरमा बोल्दै अध्यक्ष केसीले राजमोमा लाग्न सजिलो नभएको बताउनुभयो ।
‘राजनीतिमा लाग्ने भनेको धेरैका लागि व्यक्तिगत फाइदा उठाउन हो । देश र जनताको लागि राजनीति गर्न सहज छैन’ केसीले भन्नुभयो, ‘त्यसकारण राष्ट्रिय जनमोर्चामा लाग्न सजिलो छैन । फाइदा खोज्नेहरु यहाँ टिक्दा पनि टिक्दैनन् ।’
उहाँले राष्ट्रियता र जनतन्त्रको लागि निरन्तर लडिरहने पार्टी राजमो मात्रै भएको बताउनुभयो । केसीले पछिल्लो समय प्राप्त उपलब्धि गुम्ने खतरा बढेको भन्दै लोकतन्त्र र राष्ट्रियताको रक्षा र संघीयता खारेजीका लागि अझ धेरै संघर्ष गर्नुपर्ने बताउनुभयो ।
सम्मेलनले राम बहादुर बश्यालको अध्यक्षतामा १३ सदस्यीय राजमो सैनामैना नगर समिति चयन गरेको छ । साथै ३ जना सल्लाहकार रहनुभएको छ ।
समितिको उपाध्यक्षमा जयस्वर रेग्मी, सचिव बिष्णु थापा, सहसचिव उमा न्यौपाने र कोषाध्यक्षमा रामचन्द्र पौडेल रहनुभएको छ ।
सदस्यहरुमा लालबहादुर क्षेत्री, हरिप्रसाद पोख्रेल, प्रेमलाल पुरी, तुलसी खनाल, राम चन्द्र न्यौपाने, मधुसुधन पौडेल, धनन्जय पोख्रेल, नन्द प्रसाद पोखरेल वैकल्पिक सदस्यहरु खेम श्रेक्ष्ठ, सिता थापा, कल्पना मल्ल र सुधिर कार्की हुनुहुन्छ भने सल्लाहकारहरुमा कृष्ण वम मल्ल, लक्ष्मिा कुँवर र मिना भट्टराई रहनु भएको छ ।
दुई दिनसम्म सञ्चालन गरिएको सम्मेलनको उद्घाटन राजमो रुपन्देही अध्यक्ष बद्रे आलमले गर्नुभएको थियो । कम्युनिष्ट संग्राहालय नेपालका अध्यक्ष चेतनाथ आचार्य र जिल्ला सचिव टान बहादुर केसीले भेला सफलताको शुभकामना दिनुभएको थियो ।
राजमो नगर अध्यक्ष लाल बहादुर छेत्रीको अध्यक्षता, गणेश गौतमको सञ्चालनमा भएको कार्यक्रममा स्वागत रामबहादुर बस्यालले गर्नु भएको थियो ।
