धनगढी । धनगढी उपमहानगरपालिकाका स्वास्थ्यकर्मीहरुले गएको ६ महिनादेखि तलब नपाएको गुनासो गरेका छन् ।
विभिन्न तहमा कार्यरत ५५ जना स्वास्थ्यकर्मीले नियमअनुसार पाउनुपर्ने तलब भत्ता नपाएपछि आन्दोलनको घोषणा गरेका छन् । शनिबार धनगढीका मेयर गोपाल हमाललाई ज्ञापान पत्र दिएर उनीहरुले दबाबमुलक कार्यक्रम सुरु गरेका हुन् ।
भोलि (आइतबारदेखि) स्वास्थ्यकर्मीहरुले हाजिरी लगाउने तर काम नगर्ने चेतावनी दिएका छन् । आइतबारबाट उपमहानगरपालिकाको प्राङणमा भेला भइ हातमा कालोपट्टि बाँधेर धर्ना दिने ज्ञापन पत्रमा उल्लेख छ ।
कर्मचारी समायोजन ऐन अन्तर्गत उपमहानगरपालिकामा समायोजन भएका स्वास्थ्यकर्मीहरुको तलब भत्ता संघीय सरकारले व्यवस्था गर्नुपर्ने भएपनि बजेट नपठाएका कारण आफूहरुले समयमै पारिश्रमिक पाउन नसकेको सिनियर अनमी निरीक्षक गीता भट्टले बताउनुभयो । उहाँका अनुसार कर्मचारीहरुले गएको असोज महिनादेखि तलब पाउन बाँकी छ ।
स्वास्थ्यकर्मीहरुले चालू आर्थिक वर्षको तलब तत्काल व्यवस्था गर्न र आगामी आर्थिक वर्षमा संघीय सरकारबाट बजेट नआए स्थानीय तहले नै व्यवस्थापन गर्नुपर्नेलगायत पाँच बुँदे माग आन्दोलनरत कर्मचारीले गरेका छन् ।
