काठमाडौँ । राष्ट्रिय जनमोर्चाले राजनीतिक सौदाबाजीको आधारमा राष्ट्रिय स्वतन्त्र पार्टीका सभापति रवि लामिछानेलाई उन्मुक्ति दिएको आरोप लगाएको छ ।
अध्यक्ष केसीको हस्ताक्षरमा २०७९ चैत ८ गते बुधबार प्रेसवक्तव्य जारी गर्दै राजमोले यस्ता आरोप लगाएको हो ।
आफैले त्यागिसकेको नागरिकतालाई आधार बनाएर नेपाली राहदानी लिनु गैरकानुनी र दण्डनीय भएको तर्क गर्दै राजमोले सरकारको विश्वासमत प्राप्त गर्नकै लागि रविलाई उन्मुक्ति दिइएको उल्लेख छ ।
राजमोले रविको गतिविधिबाट नेपाली राष्ट्रियतामाथि आँच पुग्ने भन्दै सरकारको उनीप्रतिको व्यवहारको कडा शब्दमा भत्र्सना गरेको छ ।
यस्तो छ, प्रेसवक्तव्यको पूर्ण पाठ :
“राहदानी प्रकरणमा रवि लामिछानेका विरुद्ध प्रहरी प्रशासनमा छानबिन चलिरहेको थियो । महान्यायाधिवक्ताले राहदानी प्रकरणमा रवि लामिछानेका विरुद्ध मुद्दा चलाउने आधार नभएको भनी निजलाई सफाइ दिएका छन् ।
रवि लामिछानेले अमेरिकाको नागरिक हुँदाहुँदै त्यागिसकेको नेपाली नागरिकता प्रयोग गरी राहदानी लिएको कुरा कसैबाट लुकेको छैन । नेपालको प्रचलित कानुनले विवरण ढाँटी राहदानी लिने कार्यलाई गैरकानुनी र दण्डनीय मान्दछ । रवि लामिछानेले विवरण ढाँटी नेपालको राहदानी लिएका थिए । उनीमाथि कानुनत: मुद्दा चल्नुपर्दथ्यो तर रवि लामिछानेलाई सफाइ दिने कार्य भयो ।
रवि लामिछानेलाई सफाइ कुनै कानुनी आधारमा नभएर राजनीतिक सौदाबाजीका आधारमा नै दिइएको हो । रवि लामिछानेको पार्टीबाट विश्वासको मत प्राप्त गर्न नै प्रधानमन्त्रीले महान्यायाधिवक्तालाई दबाब दिएर उनलाई सफाइ दिने निर्णय गरेका हुन्, जुन सरासर गलत छ ।
राहदानी प्रकरणमा रवि लामिछानेलाई सफाइ दिने सरकारको कार्यको हाम्रो पार्टीले घोर विरोध तथा भत्र्सना गर्दछ ।
रवि लामिछानेको पार्टी अमेरिकी साम्राज्यवादको स्वार्थपूर्तिका लागि बनेको हो । त्यसकारण त्यो सङ्गठनको गतिविधिका कारणले देशको सार्वभौमिकता र राष्ट्रियतामा गम्भीर आँच पुग्ने कुरा थाह हुँदाहुँदै पनि सरकारले विश्वासको मत लिनका लागि उनीप्रति अपनाएको नीति भत्र्सनायोग्य छ, जसको हाम्रो पार्टीले कडा शब्दमा विरोध तथा भत्र्सना गर्दछ ।”
