काठमाडौं । नेकपा (मसाल) र महामन्त्री मोहन विक्रम सिंहविरुद्ध अनर्गल प्रचार गरेको ‘ताजाखबर’ साप्ताहिकले माफी मागेको छ । सो पत्रिकाले २०७६ माघ ७ को अंकमा मसाल प्रवक्ता रामप्रकाश पुरीको खण्डन छाप्नुका साथै क्षमायाचना गरेको हो ।
‘ताजाखबरको समाचार र कार्यकारी सम्पादक इश्वरी वाग्लेको लेखबाट सिंह र नेकपा मसालमाथि पर्नगएको चोटप्रति ताजाखबर क्षमा चाहन्छ ।’ पत्रिकाले लेखेको छ । ताजाखबरले अनर्गल प्रचार गरेको भन्दै नेकपा (मसाल) ले प्रेस काउन्सिलमा उजुरी दिएको थियो ।प्रेस काउन्सिलले पत्र पठाएपछि पत्रिकाले क्षमायाचना गरेको हो ।
पत्रिकाले ‘हाम्रो कुनै रिसराग छैन’ शीर्षकमा लेखेको छः
नेकपा मसालका प्रवक्ता रामप्रकाश पुरीले ताजाखबर साप्ताहिकमा पुष १ गते ‘प्रचण्डको कमाण्डमा,चन्द र भट्राईको फर्कने मन्त्री माग्दै मोहन बिक्रम सिंह खुमलटारमा’ र्शीषकमा समाचार र पुष १५ गते ‘स्वार्थमा चोट पर्दा पीत पत्रकारिता’ शीर्षकमा प्रकाशित लेख प्रति आपत्ति जनाउँदै आफ्नो पार्टीको तर्फबाट सांसद दुर्गा पौडेललाई मन्त्री बनाउन कुनै पनि नेतासँग परामर्श नगरेको बताएका छन् । ताजाखबर परिवार मसालका महामन्त्री मोहन विक्रम सिंह र उहाँकी धर्मपत्नी सांसद दुर्गा पौडेलप्रति कुनै रिसराग वा पूर्वाग्रह नभएको जानकारी गराउन चाहन्छ । राजनीतिक वृत्तमा चालाइएको चर्चा र पत्रपत्रिकामा प्रकाशित समाचार बाहेक ताजाखबरसँग नेकपा मसाल र महामन्त्री मोहनविक्रम सिंहको दैनिकीसँग सरोकार राख्ने जरुरी पर्दैन । ताजाखबरको समाचार र कार्यकारी सम्पादक इश्वरी वाग्लेको लेखबाट सिंह र नेकपा मसालमाथि पर्नगएको चोटप्रति ताजाखबर क्षमा चाहन्छ । र प्रेस काउन्सिलद्वारा यही बिषयलाई लिएर पठाइएको पत्र ग्रहण गर्दै सिंहसम्बन्धी प्रकाशित समाचारको खण्डन गर्न चाहन्छ ।
काउन्सिलद्वारा मसाललाई जानकारी
ताजाखबरले गरेको खण्डन र क्षमायाचनाबारे प्रेस काउन्सिलले नेकपा (मसाल) लाई पत्राचार गरी जानकारी दिएको छ ।सो पत्रमा पत्रिकालाई २०७६ माघ ६ गते पत्राचार गरेकोमा माघ ७ गते खण्डन छापेको उल्लेख गर्दै थप केही भए काउन्सिलमा जानकारी गर्न आग्रह गरिएको छ ।
यो पनि पढ्नुहोस्ः
‘काल्पनिक र झुठा समाचार सय पटक दोहोर्याए पनि सत्य हुँदैन’
