काठमाडौँ । अखिल नेपाल किसान महासङ्घ (अप्फा) ले भारतीय तरकारीमाथिको क्वारेन्टाइन जाँच बन्द गर्न लागेकोमा सरकारको सो प्रयासको निर्णयको विरोध गरेको छ ।
किसान महासङ्घ (अप्फा) का अध्यक्ष भैरवराज रेग्मीको हस्ताक्षरमा २०७९ फागुन १८ गते प्रकाशित प्रेसवक्तव्यमा यस्तो विरोध गरिएको हो ।
वक्तव्यमा भारत मात्रै नभएर बङ्गलादेश, पाकिस्तान, दक्षिण कोरियालगायत सबै देशका तरकारी, फलफूलमाथि क्वारेन्टाइन जाँच बन्द गर्ने निर्णय फिर्ता लिन माग गर्दै देशलाई कृषिमा आत्मनिर्भर बनाउनका लागि तात्कालिक र दीर्घकालीन योजना बनाउन माग गरिएको छ ।
प्रेसवक्तव्यको पूर्ण पाठ यस्तो छ :
“वर्तमान सरकारद्वारा भारतबाट आयात भएको तरकारी, फलफूलमाथि लगाइँदै आउको क्वारेन्टाइन जाँच बन्द गर्न लागेकोप्रति अखिल नेपाल किसान महासङ्घ (अप्फा) घोर विरोध र भत्र्सना गर्दछ । यस निर्णयलाई फिर्ता लिई क्वारेन्टाइन व्यवस्थालाई प्रभावकारी रूपमा कार्यान्वयनमा ल्याउन माग गर्दछ । भारतबाट मात्रै होइन, बङ्गलादेश, पाकिस्तान, दक्षिण कोरियालगायतका देशबाट पनि आयात भइरहेको तरकारी, फलफूलमाथि क्वारेन्टाइनको व्यवस्था गर्न माग गर्दछ ।
२०७९ पुस महिनाको भन्सार विभागबाट प्रकाशित तथ्याङ्कअनुसार यस आर्थिक वर्षको पुससम्म भारतबाट आठ अर्ब ५९ करोडको तरकारी आयात गरिएको थियो । यही समयमा नेपालमा किसानले उत्पादन गरेको तरकारीको मूल्य नपाउने र विक्री नभएर चितवनमा किसानले सडकमा आफ्ना उत्पादन फालेर सरकारको विरोध गरेका थिए । कृषि उत्पादनलाई आत्मनिर्भर बनाउने, विदेशबाट आयात बन्द गर्ने र मानिसको स्वास्थ्यलाई बचाउन क्वारेन्टाइनको व्यवस्था गर्नुपर्ने दायित्वबाट सरकार पन्छिँदै आएको छ । त्यसमाथि भारतीय सरकारको ठाडो दबाबमा भारतीय फलफूल, तरकारीमाथि क्वारेन्टाइन बन्द गरिएको सूचना बाहिर आएको छ । यसरी नेपाल सरकारले विदेशी शक्तिको दबाबमा देशको शासन चलाउने जनविरोधी काम जुन गरिरहेको छ, अप्फाले त्यसको कडा विरोध गर्दछ ।
यसरी भारतलगायत विदेशी फलफूल, तरकारीमाथि क्वारेन्टाइनको व्यवस्था बन्द गर्ने निर्णय फिर्ता लिन र क्वारेन्टाइन व्यवस्थालाई प्रभावकारी रूपमा कार्यान्वयन गर्न माग गर्दछ । साथै कृषि उत्पादन प्रणालीलाई आत्मनिर्भर बनाउन तात्कालिक र दीर्घकालीन व्यवस्था तुरुन्त कार्यान्वयन गर्न माग गर्दछ । यदि यसलाई कार्यान्वयन गर्न अग्रसर नभएमा सम्पूर्ण किसान सङ्घर्षमा उत्रिन बाध्य हुने छ ।”
