काठमाडौं । राष्ट्रिय जनमोर्चाका अध्यक्ष चित्रबहादुर केसीले राष्ट्रपति निर्वाचनका सन्दर्भमा अझै पनि देशी विदेशी चलखेल हुन सक्ने औँल्याउनुभएको छ ।
आइतबार साँझ प्रधानमन्त्री निवास बालुवाटारमा बसेको आठ राजनीतिक दलको बैठकमा केसीले संविधानको विरुद्ध रहेका शक्तिहरुले चलखेल गर्न सक्ने भन्दै सचेत हुन सुझाव दिनुभएको हो ।
राष्ट्रपति निर्वाचन फागुन २५ गते हुँदैछ । आठ दलले नेपाली कांग्रेसका नेता रामचन्द्र पौडेललाई साझा उम्मेदवारको रुपमा उठाएका छन् भने नेकपा (एमाले) ले सुवासचन्द्र नेम्वाङलाई उम्मेदवार बनाएको छ ।
पौडेललाई हराउन अझै पनि देशी विदेशी शक्तिले चलखेल गर्न सक्ने सम्भवाना रहेको भन्दै आ–आफ्नो दलभित्र सचेत गराउन केसीले सम्बन्धित दललाई आग्रह गर्नुभएको हो । उहाँले मतदाताहरु खरिदबिक्री हुनसक्ने सम्भावनातर्फ ठूला दललाई सचेत गराउनुभएको बैठकमा सहभागी राजमो महासचिव मनोज भट्टले जानकारी दिनुभयो ।
बैठकले राष्ट्रपति निर्वाचनको प्रचार प्रसारलाई व्यवस्थित ढंगले अघि बढाउने निर्णय गरेको छ । त्यसका लागि प्रचारको कामलाई समन्वय गर्न आठै दलबाट फोकल पर्सन तोकेको महासचिव मनोज भट्टले जानकारी दिनुभयो ।
जसमा नेपाली कांग्रेसकातर्फबाट उपसभापति पूर्णबहादुर खड्का, माओवादी केन्द्रका नेता शक्ति बस्नेत, एकीकृत समाजवादीबाट महासचिव बेदुराम भूसाल, जनता समाजवादी पार्टीबाट राजेन्द्र श्रेष्ठलाई फोकल पर्सन तोकिएको छ।
त्यस्तै जनमत पार्टीबाट अब्दुल खाँ, लोकतान्त्रिक समाजवादी पार्टीबाट शरतसिंह भण्डारी, नागरिक उन्मुक्ति पार्टीबाट रञ्जिता श्रेष्ठ र राष्ट्रिय जनमोर्चाबाट उपाध्यक्ष दुर्गा पौडेललाई फोकल पर्सन तोकिएको छ ।
