काठमाडौँ । राष्ट्रिय जनमोर्चाले नेपाली काङ्ग्रेसको तर्फबाट राष्ट्रपति पदका उम्मेदवार रामचन्द्र पौडेललाई समर्थन गरेको छ ।
एमालेले अहिले पनि प्रतिगमनकारी भूमिका खेलिरहेको भन्दै पार्टीले प्रतिगमन विरोधी दलका उम्मेदवारलाई राजमोले समर्थन गर्ने बताएको हो ।
अध्यक्ष चित्रबहादुर केसीको हस्ताक्षरमा २०७९ फागुन १३ गते शनिबार प्रेसवक्तव्य जारी गर्दै सो जानकारी दिइएको हो ।
प्रेसवक्तव्यको पूर्ण पाठ यस्तो छ :
“२०७९ फागुन २५ गते हुन गइरहेको राष्ट्रपतिको निर्वाचनमा नेपाली काङ्ग्रेसले राष्ट्रपतिको उम्मेदवारका रूपमा श्री रामचन्द्र पौडेललाई अगाडि सारेको छ । हाम्रो दलले नेपाली काङ्ग्रेसको तर्फबाट राष्ट्रपतिको उम्मेदवार रहनुभएका श्री रामचन्द्र पौडेललाई समर्थन गर्ने निर्णय गरेको छ ।
नेकपा (एमाले) को नेतृत्वले देशमा प्रतिगमन लाद्न विगत दुई वर्षदेखि लगातार प्रयत्न गरिरहेको छ । अहिले पनि नेकपा (एमाले) को नेतृत्व प्रतिगमनको उद्देश्यबाट पछाडि हटेको छैन । विगतमा दुई दुईपटक संसद् भङ्ग गरेर नौ नौ महिनासम्म संसद्लाई चल्न नदिएर, जनताका आवाजलाई संसद्मा उठाउनबाट सांसदलाई बञ्चित गरेको कुरा सबैको अगाडि जगजाहेर छ । संसद् जनप्रतिनिधि संस्था नभएर प्रधानमन्त्रीको कठपुतली संस्था हो, प्रधानमन्त्रीले चाहेका बखत कुनै पनि बेला भङ्ग गर्न सकिन्छ भन्ने मान्यताबाट एमाले पछाडि हटेको छैन । राज्यका सबै प्रमुख पदमा कब्जा गरेर एमालेले देशमा अधिनायकवादको अभ्यास गर्न खोजिरहेको छ । एमालेको उद्देश्य राष्ट्रपति संस्थालाई आफ्नो छुद्र राजनीतिक स्वार्थका लागि प्रयोग गर्ने गुरुयोजना रहेको छ । विगतमा पनि एमालेले राष्ट्रपति जस्तो सम्मानित र उच्च संस्थालाई आफ्नो राजनीतिक स्वार्थका लागि प्रयोग गरेर राष्ट्रपति संस्थालाई विवादित बनाएर त्यसको छविलाई धुमिल पारेको इतिहास सबैका अगाडि स्पष्ट नै छ । त्यो स्थिति नदोहोरियोस् भन्नका लागि प्रतिगमनका विरुद्ध रहेका दलमध्येबाट नै राष्ट्रपतिको उम्मेदवार बनाउनु उपयुक्त हुन्थ्यो । त्यसैले काङ्ग्रेसले अगाडि सारेको उम्मेदवारलाई समर्थन गर्दै विजय गराउनुपर्ने आवश्यकतामा हाम्रो दलले जोड दिन्छ ।”
