काठमाडौं । प्रधानमन्त्री केपी शर्मा ओलीले चाँडै नै मिर्गौला प्रत्यारोपण गर्ने जानकारी दिनुभएको छ । मंगलबार सम्पादकहरुसँगको अन्तरक्रियामा प्रधानमन्त्री ओलीले एउटा मिर्गौलामा सामान्य समस्या आएको भन्दै छिट्टै प्रत्यारोपण गर्ने बताउनुभएको हो ।
प्रधानमन्त्री ओलीले समस्या देखिएको मिर्गौला किन राख्ने ? भन्दै त्यसलाई छिट्टै परिवर्तन गर्ने र थप तीन वर्ष अझ सक्रियता र सशक्त भएर सरकारको काममा लाग्ने बताउ नुभयो । ओलीको १२ वर्षअघि मिर्गौलाको प्रत्यारोपण भएको थियो । केही महिनायता समस्या देखिन थालेपछि उहाँले नियमित डायलासिस गराइरहनुभएको छ ।
एमसीसी यही अधिवेशनबाट पारित हुन्छ
अन्तरक्रियामा प्रधानमन्त्री ओलीले अमेरिकासँग गरिएको मिलेनियम च्यालेन्ज कम्प्याक्ट (एमसीसी) संसदको यही अधिवेशनबाटै परित हुने दावी गर्नुभयो ।पार्टीभित्र केही नेताहरुमा बुझाइको कमी देखिएका कारण विरोधजस्तो देखिए पनि त्यसको छिट्टै हल हुने प्रधानमन्त्री ओलीको भनाई थियो ।
‘पार्टीभित्र केही साथीहरुमा कन्फ्युज देखिएका कारण अध्ययन समिति बनाएका छौँ’, उहाँले भन्नुभयो, ‘अध्ययन समितिले साथीहरुमा रहेको कन्फ्युज स्पष्ट पारेपछि यो पारित हुन्छ ।’
बुधबारदेखि आइतबारसम्म राष्ट्रिय गृहमा बसेको नेकापाको केन्द्रीय समितिको दोस्रो पूर्ण बैठकमा पनि धेरैजसो केन्द्रीय सदस्यहरुले एमसीसीबारे प्रश्न उठाएका थिए । त्यसपछि नेकपाले एमसीसीबारे अध्ययन गर्न वरिष्ठ नेता एवं पूर्वप्रधानमन्त्री झलनाथ खलाको संयोजकत्वमा स्थायी समिति सदस्य भीम रावल र परराष्ट्रमन्त्री प्रदीप ज्ञवाली रहेको एक अध्ययन समिति बनाएको थियो ।
