धनगढी । एमसीसी र सीमा अतिक्रमण विरुद्ध नेकपा (मसाल) सहितका ६ राजनीतिक दलले शुक्रबार धनगढीमा प्रदर्शनको तयारी गरेका छन् । राष्ट्रिय जनमोर्चाका केन्द्रीय सदस्य एवं सूदुरपश्चिम प्रदेशका अध्यक्ष नन्दराज भट्टको अध्यक्षतामा मंगलबार बसेको बैठकले माघ २४ गते धनगढीमा विरोध सभा गर्ने योजना बनाएको हो ।
एमसीसी प्रकरण तथा सीमा अतिक्रमणका विरुद्ध नेकपा (मसाल), नेकपा (क्रान्तिकारी माओवादी) लगायत नौ राजनीतिक दलले शुक्रबार धनगढीसहित सातै प्रदेशमा विरोध सभाको आयोजना गर्ने निर्णय गरेको थियो । राष्ट्रिय जनमोर्चा सुदूरपश्चिम प्रदेश समिति र कैलाली जिल्ला समितिले यसअघि नै बैठक बसेर विरोध सभा सम्पन्न गर्नेबारे निर्णय गरेका थिए ।
मंगलबार सम्पन्न ६ राजनीतिक दलको बैठकमा राष्ट्रिय जनमोर्चाका केन्द्रीय सदस्य तथा सुदूरपश्चिम प्रदेश अध्यक्ष नन्दराज भट्ट, नेकपा (माओवादी केन्द्र) का पोलिटव्युरो सदस्य तथा सुदूरपश्चिम प्रदेश संयोजक लोकराज जैसी, नेकपा (क्रान्तिकारी माओवादी)का केन्द्रीय सदस्य राम बहादुर केसी, नेकपा (माले) का केन्द्रीय सदस्य परेक रावल, नेकपा (मसाल) कैलाली जिल्ला प्रवक्ता मिलन शाही, देशभक्त जनगणतान्त्रिक मोर्चा नेपालका केन्द्रीय सदस्य विष्णुराम दमाईलगायतको उपस्थिती रहेको थियो ।
