काठमाडौं । राजनीतिक मामिलासम्बन्धी अमेरिकी उपविदेशमन्त्री भिक्टोरिया नुल्यान्ड नेपाल आएकी छन् । मिलेनियम च्यालेन्ज कर्पोरेशन (एमसीसी) नेपाल कम्याक्ट सम्झौता कार्यान्वयनबारे बुझ्न उनी नेपाल आएकी हुन् ।
उपविदेशमन्त्री नुल्याण्डले प्रधानमन्त्री पुष्पकमल दाहाल प्रचण्डसँग भेटवार्ता गरेकी छन् । आइतबार साँझ नेपाल आइपुगेकी नुल्यान्डसँग सोमबार बिहान प्रधानमन्त्री प्रचण्डले भेटवार्ता गरेका हुन् ।
सरकारी निवास बालुवाटारमा उनीहरूबीच भेटवार्ता भएको हो।
उपविदेशमन्त्री भिक्टोरियाले प्रधानमन्त्री परराष्ट्रमन्त्री विमला राई पौड्यालसँग पनि भेटवार्ता गर्ने परराष्ट्र मन्त्रालय स्रोतले जनाएको छ ।
उनले नेपाल भ्रमणमा प्रचण्ड नेतृत्वको सरकारको अमेरिका—नेपाल सहकार्यबारे दृष्टिकोण बुझ्नेछिन् भने एमसीसी सम्झौता कार्यान्वयनबारे पनि छलफल गर्नेछिन् ।
सन् २०२१ अप्रिलमा वर्तमान जिम्मेवारी सम्हालेयता उनले दक्षिण एसियाका केही मुलुकको भ्रमण गरे पनि नेपाल आएकी थिइनन्।
नुल्याण्ड विभिन्न भूमिकामा ३३ वर्ष विदेश सेवामा बिताइसकेकी अमेरिकी अधिकारी हुन्। उनी नयाँ सरकार बनेपछि नेपाल भ्रमण गर्ने सबैभन्दा वरिष्ठ अमेरिकी अधिकारी हुन् ।
तत्कालीन बाराक ओबामा प्रशासनका बेला उनी सन् २०१३ देखि २०१७ सम्म युरोपेली तथा एसिया मामिला हेर्ने उपसहायक विदेशमन्त्री थिइन्।
नेपालपछि उनले भारत र श्रीलंकाको भ्रमण पनि गर्नेछिन्।
नुल्याण्डपछि एक अर्का अधिकारी अमेरिकी सहयोग नियोग युएसएआईडीका एडमिनिस्ट्रेटर समन्था पावर पनि फेब्रुअरी महिनामा नेपाल आउने स्रोतले जनाएको छ ।
