डाकार । अफ्रिकी विकास बैङ्कले अफ्रिकी देशमा खाद्य सुरक्षाको प्रयोजनका लागि आर्थिक सहयोग गर्ने भएको छ ।
सो सहयोगको रकमबाट अफ्रिकी देशमा खाद्यसुरक्षाका लागि आवश्यक कार्यक्रम तथा आयोजना सञ्चालन गरिने बताइएको छ ।
अफ्रिकी विकास बैङ्कका अध्यक्ष अकिनुवी अकेसिनाले बुधबार सो कुराको जानकारी दिनुभएको समाचारमा जनाइएको छ ।
अफ्रिकी देशमा कृषिको विकास तथा यससम्बन्धी आयोजनाको सञ्चालनका साथै यसका माध्यमबाट त्यहाँ खाद्यान्नको सुरक्षा गर्ने विषयमा सो बैङ्कले अहिलेका लागि १० अर्ब अमेरिकी डलर बराबरको सहयोग दिन थालेको उहाँले जानकारी दिनुभयो ।
डाकार खाद्य सुरक्षासम्बन्धी दोस्रो सम्मेलनका क्रममा बुधबार अध्यक्ष अदेसिनाले सो घोषणा गर्नुभएको हो । उहाँले भन्नुभयो– सो रकम ती देशलाई उपलब्ध गराउने प्रत्यक्ष सहयोग हो र यसबाट खाद्यान्न खरिद गर्नुका साथै कृषिका आयोजना सञ्चालन गरेर खाद्यान्न उत्पादनका काममा प्रयोग गर्न सकिने छ ।
सम्मेलनलाई सम्बोधन गर्दै उहाँले थप्नुभयो– अफ्रिकी देशहरू अहिले पनि आफ्ना उत्पादनको निर्यातको सट्टा खाद्यान्नको आयातमा निर्भर हुनु परिरहेको छ र यो ठुलो दुर्भाग्य पनि हो ।
अहिले पनि विश्वको खेतीयोग्य जमिनको ठुलो हिस्सा अफ्रिकी देशमा पर्दछ तर यहाँका नागरिक भोकै सुत्नुपर्ने अवस्था छ भन्दै उहाँले सबै देशलाई उत्पादनका क्षेत्रमा लाग्न आग्रह पनि गर्नुभएको थियो ।
डाकारमा बुधबार सुरु भएको सो सम्मेलन यही शुक्रबारसम्म चल्ने छ । सम्मेलनमा अफ्रिकामा खाद्यान्नको सहयोगभन्दा पनि उत्पादनका लागि के कसरी तयारी गर्ने भन्नेबारेमा छलफल भइरहेको छ । (रासस/सिन्ह्वा)
