काठमाडौं । राष्ट्रिय स्वतन्त्र पार्टीका सांसद डा. ढाकाकुमार श्रेष्ठमाथि आर्थिक अनियमतिताको आरोप लागेको छ ।

स्वास्थ्यमन्त्री बन्न लबिङ गरिरहेका श्रेष्ठ संगल्न सहकारी डुबेपछि त्यसको दोष उनीमाथि लागेको हो ।

रास्वपाको समानुपातिक सांसद रहेका कास्कीका मेडिकल डाक्टर श्रेष्ठ संलग्न ‘साथी किसान सहकारी संस्था’ डुबेसँगै उनीमाथि आर्थिक अनियमितताको आरोप लागेको हो ।

२०५९ सालमा स्थापित तथा पोखरा ८ रत्नचोकमा कार्यालय रहेको सहकारी अहिले बन्द छ । सहकारीले बचतकर्ताहरुको ८२ लाख ७२ हजार दुई सय रुपैयाँ भुक्तानी गर्नुपर्ने देखिएको छ ।

तर, रकम नै नभएपछि कार्यालय नै बन्द गरिएको सो सहकारीका कोषाध्यक्ष तारापति सुवेदीले बताएका छन् । सहकारी बन्द भएसँगै बचतकर्ताहरुले आफ्नो रकम फिर्ता गर्न पोखरा महागनरपालिकाको सहकारी डिभिजन गुहारेका थि।

उनीहरुले सहकारी डुब्नुमा निवर्तमान अध्यक्ष ढाकाकुमार श्रेष्ठसमेत दोषी रहेको जिकिर गरेका थिए।

तर, ढाकाकुमारले भने त्यो आरोपको खण्डन गरे । शुक्रबार पत्रकार सम्मेलन गरी उनले कात्तिक ७ गते नै साधारणसभा गरेर अध्यक्ष पद छाडेको बताए । यद्यपी अध्यक्ष छाडेपछि नयाँ कार्यसमितिलाई हरहिसाब र सम्पत्ति बुझबुझारथ गर्नुपर्ने बारे आफूले थाह नपाएको उनले जिकीर गरे ।

उनले सहकारीले कर्जा प्रवाह गरेको १ करोडभन्दा बढी रकम उठाउन बाँकी रहेको र आउँदो ३ महिनाभित्र सवै बचतकर्ताको रकम फिर्ता गर्ने सहमति भएको पनि दनबी गरे ।

डा. ढाकाकुमारले कोरोनाकालबाटै सहकारी समस्यामा परेको र सहकारीले बजारमा उठाउनुपर्ने रकम उठाउन नसकिएको स्वीकारे ।

यता, सोही सहकारीमा म्यानेजर पदमा रहेर काम गरेका विशाल बस्ताकोटीले सेवाग्राहीको रकम हिनामिना गर्न संस्था दोषी रहेको जिकिर गरेका छन् । उनले २५ हजारको जागिर खानका लागि १० लाख रुपैयाँ लिएर आउन भनेपछि पदबाटै राजीनामा दिएको दाबी गरे । उनका अनुसार संस्थाकै सेयर सदस्यले ३० लाख रुपैयाँ ऋण तिर्न बाँकी रहेको थियो।

उनले सहकारीबाट विना धितो ऋण प्रवाह गरिएको र गलत अडिट रिपोर्ट पेश भएको बताए ।