काठमाडौं । सत्ताबाहिर पुगेको नेपाली कांग्रेसले राष्ट्रिय प्रजातन्त्र पार्टीका अध्यक्ष राजेन्द्र लिङदेनलाई प्रधानमन्त्री बन्न अफर गरेको छ ।
एमाले–माओवादीलगायतका दल मिलेर बनेको प्रधानमन्त्री पुष्पकमल दाहाल प्रचण्डको सरकार ढाल्न कांग्रेसले लिङ्देनलाई प्रधानमन्त्री ‘अफर’ गरेको हो ।
वर्तमान सरकारलाई समर्थन गरेको राप्रपा सरकारमा सहभागी छैन । सरकारमा जान उसले केही माग अगाडि सारेको छ ।
आज (शुक्रबार) सत्ता गठबन्धनले न्यूनतम साझा कार्यक्रम तय गर्दैछन् भने २६ गते प्रधानमन्त्री दाहालले विश्वासको मत लिने कार्यक्रम छ । आफ्ना माग पुरा भएको खण्डमा राप्रपाले दाहाल नेतृत्वको सरकारलाई विश्वासको मत दिँदैछ ।
तर, नेपाली कांग्रेसले भने दाहालले विश्वासको मत लिनुअघि राप्रपालाई सत्तागठबन्धनबाट अलग गर्ने प्रयासस्वरुप प्रधानमन्त्री अफर गरेको हो । कांग्रेस सभापति शेरबहादुर देउवाले पार्टी अध्यक्ष लिङदेनलाई प्रधानमन्त्री बन्न प्रस्ताव गरेको राप्रपाका एक नेताले बताए । तर, यसबारे राप्रपाले निर्णय गरिसकेको छैन ।
२७५ सदस्यीय प्रतिनिधिसभामा विश्वासको मतका लागि कम्तिमा १३८ मत चाहिन्छ ।
पुस १० गते माओवादी, एमाले, रास्वपा, राप्रपा, जसपा र केही स्वतन्त्र सांसदहरुको समर्थनमा दाहाललाई प्रधानमन्त्री नियुक्त गरिएको हो ।
सरकारलाई समर्थन गरेका दलहरु राप्रपा र जनता समाजवादी पार्टीलाई गठबन्धनबाट अलग गर्ने कांग्रेसको प्रयास छ । यसै योजना अन्तर्थत देउवा र जसपा अध्यक्ष उपेन्द्र यादवबीच हिजो देउवा निवास धुम्बाराहीमा छलफलसमेत भएको थियो ।
हाल प्रतिनिधि सभामा सत्तारुढ दलहरु एमालेसँग ७९ सिट छ भने माओवादीको ३२, राष्ट्रिय स्वतन्त्र पार्टीको २०, राप्रपाको १४, जसपा १२ र जनमत पार्टीको ६ र नागरिक उन्मुक्ति पार्टीका ३ सिट रहेको छ ।
विपक्षमा रहेको कांग्रेसको ८९ सिट हुँदा एकीकृत समाजवादीका १०, लोकतान्त्रिक समाजवादी पार्टीका ४, नेपाल मजदुर किसान पार्टी र राष्ट्रिय जनमोर्चाका १–१ जना सांसद छन् ।
स्वतन्त्र ५ जना मध्ये तीन जनाले सत्ता गठबन्धनलाई समर्थन गरेका थिए । ती मध्ये एक सांसद एमालेमा प्रवेश गरिसकेका छन् ।
