काठमाडौं । नेकपा (एकीकृत समाजवादी) ले संसदीय दलको नेतामा अध्यक्ष माधवकुमार नेपाललाई चयन गरेको छ ।

सोमवार बसेको पार्टीको बैठकले अध्यक्ष नेपाललाई संसदीय दलको नेतामा चयन गरेको हो । बैठकपछि सञ्चारकर्मीहरुसँगको कुराकानी गर्दै पार्टीका महासचिव वेदुराम भुसालले संसदीय दलको नेताको प्रश्तावमा संसदीय दलको उपनेतामा उपाध्यक्ष राजेन्द्रप्रसाद पाण्डे र दलको सचेतकमा उप–महासचिव प्रकाश ज्वालालाई चयन गरेको बताउनु भयो ।

महासचिव भुसालले पार्टी अहिले सरकारमा जाने पक्षमा रहेको पनि बताउनु भयो । उहाँले गठबन्धनको सरकारमा जाने निर्णय पार्टीले गरे पनि कसको नेतृत्वमा कसरी जाने भन्ने विषयमा छलफल नभएको बताउनु भयो ।

महासचिव भुसालले आईतवार पार्टीको सचिवालय बैठकले गठबन्धमा आवश्यक छलफल बढाउने र अन्य दलहरुसँग पनि छलफल गरेर सरकारमा जाने निर्णय गरेको बताउनु भयो ।