काठमाडौं । चारदलीय गठबन्धनका प्रमुख चारै नेताहरु प्रतिनिधि सभामा विजयी भएका छन् । यही मंसिर ४ गते सम्पन्न प्रतिनिधि सभा तथा प्रदेश सभा निर्वाचनमा गठबन्धनका शीर्ष नेताहरु अनुमोदित भएका हुन् ।
नेपाली कांग्रेसका सभापति तथा प्रधानमन्त्री शेरबहादुर देउवा, नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाल र राष्ट्रिय जनमोर्चाका अध्यक्ष चित्रबहादुर केसी निर्वाचित हुनुभएको छ ।
कांग्रेस सभापति देउवाले डडेलधुराबाट २५ हजार ५३४ मत ल्याएर विजयी हुनुभयो । उहाँका निकटतम प्रतिष्पर्धी स्वतन्त्र उम्मेदवार सागर ढकालको १३ हजार ४२ मत आएको थियो ।
त्यस्तै, माओवादी केन्द्रका अध्यक्ष ‘प्रचण्ड गोरखा–२ बाट आफ्ना निकटतम प्रतिद्वन्द्वी राष्ट्रिय स्वतन्त्र पार्टीका उम्मेदवार कविन्द्र बुर्लाकोटीलाई १३ हजार ४६६ मतले पछाडि पार्दै विजयी हुनुभएको हो । दाहालको २६ हजार १०३ मत आएको छ ।
यता, रौतहट १ बाट एकीकृत समाजवादीका अध्यक्ष नेपाल ३३ हजार ५२२ मत ल्याएर विजयी हुनुभयो ।
उहाँका प्रतिस्पर्धी नेकपा एमालेका अजयकुमार गुप्ताले २६ हजार ९२२ मतप्राप्त गर्नुभएको छ ।
यसैगरी, राजमोका अध्यक्ष केसी २१ हजार ४५१ मत ल्याएर विजयी हुनुभएको हो । उहाँको प्रतिद्वन्द्वी एमालेका उम्मेदवार सूर्य पाठकले १८ हजार ८२५ मत ल्याएका थिए ।
गठबन्धन दलका शीर्ष नेताहरु मध्ये गठबन्धनका चुनावी कमाण्डर कांग्रेसका वरिष्ठ नेता रामचन्द्र पौडेल तनहुँबाट विजय हुनुभएको छ । तर, सिट बाडफाँट कार्यदलका संयोजक कांग्रेस नेता कृष्ण सिटौला झापाबाट, राजमो उपाध्यक्ष दुर्गा पौडेल प्युठानबाट, माओवादीका महासचिव देव गुरुङ लमजुङबाट पराजित हुनुभएको छ ।
कांग्रेस नेता पौडेल तनहुँ १ बाट प्रतिस्पर्धी एमालेका एकबहादुर रानामगरलाई ५ हजार ३७५ मतको अन्तरले हराउँदै प्रतिनिधि सभा सदस्य चयन हुनुभएको हो ।
राजमो उपाध्यक्ष पौडेल भने प्युठानबाट ५ हजार २७४ मतले पराजित हुनुभएको थियो । एमालेका सूर्य थापा ४१ हजार ११८ मत ल्याएर निर्वाचित हुँदा पौडेलको ३५ हजार ८४४ मत आएको छ ।
पूर्वप्रधानमन्त्री तथा एकीकृत समाजवादीका सम्मानीत नेता झलनाथ खनाल इलाममा पछि पर्नुभएको छ ।
पाँचदलीय गठबन्धनका दलहरुमध्ये उपेन्द्र यादव नेतृत्वको जसपाले अन्तिम समयमा गठबन्धन तोडेर एमालेसँग चुनावी तालमेल गरेको थियो भने अर्को मधेशवादी दल महन्थ ठाकुर नेतृत्वको लोसपा गठबन्धनसँग तालमेल गर्न आएको थियो । यादव र ठाकुर दुवै जना पराजित भैसकेका छन् ।
