काठमाडौं । निर्वाचन आयोगले आचारसंहिता उल्लंघन गरेर राजनीतिक दलको प्रचारमा हिँड्ने विभिन्न व्यक्तिहरुसँग धमाधम स्पष्टीकरण सोधेको छ । सार्वजनिक पद धारण गरेको व्यक्ति राजनीतिक दलको प्रचार गर्न नहुने भएपनि कतिपय शिक्षक, प्राध्यापक, कर्मचारी, जनप्रतिनिधिलगायतले कुनै दल वा उम्मेदवारको प्रचार प्रसारमा संलग्न भएको पाएपछि आयोगले स्पष्टीकरण सोधेको हो ।

पञ्चकन्या माध्यमिक विद्यालयका शिक्षक ऋषि पुडासैनीलाई स्पष्टीकारण
निर्वाचन आयोगले इन्द्रसरोवर गाउँपालिका, वडा नं. ४ मकवानपुरको पञ्चकन्या माध्यमिक विद्यालयका शिक्षक ऋषि पुडासैनीलाई स्पष्टीकारण सोधेको छ ।

निर्वाचन आचारसंहिता विपरित पुडासैनीले राजनीतिक दलको सभा, सम्मेलन तथा जुलुश र प्रचार प्रसारमा सहभागी भएको भन्ने उजुरी परेको हुँदा स्पष्टीकरण सोधिएको हो ।

निर्वाचन आचारसंहिता, २०७९ को दफा १०, विद्यालय, महाविद्यालय वा विश्वविद्यालय तथा सोमा सम्बद्ध कर्मचारी, प्राध्यापक तथा शिक्षकले पालना गर्नुपर्ने आचरण अन्तर्गतको खण्ड (क) मा कुनै राजनीतिक दल वा उम्मेदवारको पक्ष वा विपक्षमा प्रचारप्रसारमा संलग्न हुन वा प्रचारप्रसार गर्न नहुने व्यवस्था छ ।

ऐ. आचारसंहिताको ऐ. दफाको खण्ड (ज) मा ‘सामाजिक सञ्जालमा कुनै राजनीतिक दल वा उम्मेदवारको पक्ष वा विपक्षमा कुनै सन्देश, सूचना, प्रचारप्रसारका सामग्री पोष्ट वा शेयर गर्न वा सामाजिक सञ्जाल मार्फत मत माग्न नहुने’ व्यवस्था छ ।

उल्लेखित सन्दर्भमा तपाईंले राजनीतिक दलको निर्वाचन प्रचारप्रसार गर्नुभएको होइन भन्ने आधार प्रमाण के छ ? यदि तपाईंले दलको प्रचारप्रसार गर्ने कार्य गर्नुभएको हो भने तपाईंलाई निर्वाचन आयोग ऐन, २०७३ को दफा २३ को उपदफा (३) बमोजिम जरिबाना र ऐ. ऐनको दफा ४४ बमोजिम विभागीय कारबाही गर्नु नपर्ने कारण के छ ? यो पत्र प्राप्त भएको २४ (चौबीस) घण्टाभित्र निर्वाचन आयोग वा प्रदेश निर्वाचन कार्यालय मकवानपुरमा प्राप्त हुने गरी स्पष्टीकरण पेश गर्न भनिएको छ ।

छिपहरमाई गाउँपालिका पर्साका नगरप्रमुख र प्रमुख प्रशासकीय अधिकृतलाई स्पष्टीकरण
यस्तै, आयोगले छिपहरमाई गाउँपालिका पर्साका नगरप्रमुख र प्रमुख प्रशासकीय अधिकृतलाई स्पष्टीकरण सोधेको छ । नगरपालिकाले मिति २०७९/५/२५ गतेको सूचनाबाट करार सेवामा शिक्षक नियुक्त गर्ने सूचना प्रकाशन गरी उक्त प्रक्रिया हालसम्म जारी रहेको भन्ने विषयमा अख्तियार दुरुपयोग अनुसन्धान आयोगमा परेको उजुरी आयोगमा प्राप्त भएकाले स्पष्टीकरण सोधेको हो ।

डडेल्धुरा क्याम्पसका हेमा भट्टलाई स्पष्टीकरण
यसैगरी, डडेल्धुरा क्याम्पसका हेमा भट्टलाई आयोगले स्पष्टीकरण सोधेको छ । भट्टले आफ्नो फेसबुक पेजमार्फत राजनीतिक दलको चुनावी प्रचारप्रसार गरेको भनी उजुरी परी राष्ट्रिय सतर्कता केन्द्रमार्फत आयोगमा लेखी आएकोले स्पष्टीकरण सोधेको हो ।

रत्नराज्यलक्ष्मी क्याम्पस, काठमाडौंका खिलराज सापकोटालाई स्पष्टीकरण
यता, निर्वाचन आयोगले रत्नराज्यलक्ष्मी क्याम्पस, काठमाडौंका खिलराज सापकोटालाई स्पष्टीकरण सोधेको छ । सापकोटाले आफ्नो फेसबुक पेजमार्फत राजनीतिक दलको चुनावी प्रचारप्रसार गरेको भनी उजुरी परी राष्ट्रिय सतर्कता केन्द्रमार्फत आयोगमा लेखी आएकोले स्पष्टीकरण सोधिएको आयोगले जनाएको छ ।

मेची बहुमुखी क्याम्पसका उपप्राध्यापक कुमार सुवेदीलाई स्पष्टीकरण
निर्वाचन आयोगले मेची बहुमुखी क्याम्पसका उपप्राध्यापक कुमार सुवेदीलाई स्पष्टीकरण सोधेको छ । सुवेदीले फेसबुक पेजमार्फत राजनीतिक दलको चुनावी प्रचारप्रसार गरेको भनी उजुरी परी राष्ट्रिय सतर्कता केन्द्रमार्फत आयोगमा लेखी आएकोले स्पष्टीकरण सोधिएको हो ।
आयोगले धनकुटा बहुमुखी क्याम्पसका प्रमुख होमबहादुर बस्नेतलाई पनि स्पष्टीकरण सोधेको छ । क्याम्पस प्रमुख बस्नेतले आफ्नो फेसबुक पेजमार्फत राजनीतिक दलको चुनावी प्रचारप्रसार गरेको भनी उजुरी परी राष्ट्रिय सतर्कता केन्द्रमार्फत आयोगमा लेखी आएकोले आयोगले स्पष्टीकरण सोधेको हो ।

जनज्योति आधारभूत प्राथमिक विद्यालयका भुवन आचार्यलाई स्पष्टीकरण
यसैगरी, निर्वाचन आयोगले जनज्योति आधारभूत प्राथमिक विद्यालयका सुनकोशी गाउँपालिका वडा नं.५, सिन्धुलीका भुवन आचार्यलाई स्पष्टीकरण सोधेको छ । निर्वाचन आचारसंहिता विपरित आफ्नो फेसबुक पेजमार्फत राजनीतिक दलको चुनाव प्रचारप्रसार गरेको भनी उजुरी परी राष्ट्रिय सतर्कता केन्द्र मार्फत लेखी आएको हुँदा आयोगले स्पष्टीकरण सोधेको हो ।