जुम्ला । जुम्लामा निर्वाचनमा खटिएको टोली सवार जीप दुर्घटना हुँदा ६ जना घाइते भएका छन् ।
तिला गाउँपालिका–४ मा निर्वाचन टोली र सामाग्री लिएर गएको जिप दुर्घटनामा परेको हो । जीप सडकदेखि २० मिटर तल खसेको छ।
बिहीबार त्रिवेणीबाट जनजागृती मावी ताम्ती मतदान केन्द्रमा खटिएको टोलि सवार भे १ च २१८८ नम्वरको बोलेरो जिप अनियन्त्रित भइ दुर्घटना हुँदा ५ जना घाइते भएका प्रहरीले जनाएको छ । प्रदेश प्रहरी कार्यालय कर्णालीका अनुसार घाइतेहरुको अवस्था सामान्य छ ।
दुर्घटनामा मतदान केन्द्रमा खटिएका मतदान अधिकृत हरिप्रसाद देवकोटा, सहायक मतदान अधिकृत आदीप्रसाद न्यौपाने, नेपाल प्रहरीका सई सीताराम दराई, सहायक हवलदार सुरज चन्द, प्रहरी जवान राजेन्द्र विष्ट र कार्यालय सहयोगी अंगराज गिरी घाइते भएका छन्।
घाइतेहरुको कर्णाली स्वास्थ्य विज्ञान प्रतिष्ठानमा उपचार भइरहेको कर्णाली प्रदेश प्रहरी कार्यालयले जनाएको छ ।
जिप चालकलाई नियन्त्रणमा लिइएको छ। गाडीमा ८ जना सवार रहेका थिए।
