काठमाडौं । नेपाल पत्रकार महासंघ इमेज प्रतिष्ठान शाखाको अगुवाईमा इमेज टेलिभिजनमा बुधबार धर्ना दिइएको छ ।
महासंघ प्रतिष्ठान शाखा र केन्द्रीय समितिले उठाउदैं आएको माग सम्बोधन गर्ने सवालमा इमेज व्यवस्थापन पक्षले उदासिनता देखाएपछि फेरि दोहोर्याएर आज महासंघले इमेजको कार्यालय लाजिम्पाटमा एकघण्टा धर्ना दिएको हो ।
महासंघ केन्द्रको अगुवाइमा यसअगाडि पनि इमेज प्रतिष्ठान शाखामा धर्ना दिइएको थियो । दुवै पक्षले वार्ता टोली बनाएर वार्ता गर्दा पनि महासंघले उठाएको माग सम्बोधन गर्नुको साटो व्यवस्थापन पक्षले टार्दै जाने र वार्ता समेत धकेल्दै जान थालेपछि महासंघले अब वार्ता र संर्घषका कार्यक्रम सँगसँगै लाने गरी इमेज प्रतिष्ठान शाखामा आज एक घण्टा धर्ना दिएको हो ।
माग सम्बोधन नभए भोलि विहान साढे ११ बजे पुनः धर्ना दिने इमेज प्रतिष्ठान शाखाका अध्यक्ष शंकर खनालले जानकारी दिनुभयो ।
बुधबारको धर्ना कार्यक्रमलाई नेपाल पत्रकार महासंघका केन्द्रीय सदस्य रामकृष्ण अधिकारी, विकास कार्की, एसोसिएट प्रदेश कमिटिका अध्यक्ष बैकुन्ठ पराजुली, इमेज प्रतिष्ठान शाखाका अध्ययक्ष शंकर खनाल लगायतले सम्बोधन गर्नुभएको थियो ।
दसैँको मुखमा पनि नियमित पारिश्रमिक नदिने, दसैँ पेश्की नदिने, २८ महिनायताको नागरिक लगानी कोषमा पत्रकारहरुको पारिश्रमिकबाट कटौती गर्ने तर व्यवस्थापनले त्यसमा पैसा जम्मा नगरिदिने लगायतका श्रम समस्या देखिएपछि महासंघ आन्दोलनमा उत्रेको हो ।
भोलि बिहानसम्म बाँकी तलब लगायत अन्य सेवा सुविधा बारे सम्बोधन गर्न व्यवस्थापन तयार नभए संघर्षका कार्यक्रमलाई थप चर्काएर लैजाने इमेज प्रतिष्ठान शाखाका अध्यक्ष शंकर खनालले बताउनुभयो ।
