काठमाडौं । राष्ट्रपति विद्यादेवी भण्डारीले नागरिकता विधेयकबारे विभिन्न दल तथा सरोकारवाला व्यक्तिहरुसँग छलफल जारी राख्नुभएको छ । बुधबार राष्ट्रपति भण्डारीले साना पाँच वाम दलसँग परामर्श गर्नुभयो ।
राष्ट्रपतिका प्रेस विज्ञ टिका ढकालका अनुसार नागरिकता विधेयकका विषयमा राष्ट्रपतिले विभिन्न पक्षसँग परामर्श जारी राख्नुभएको हो ।
वैज्ञानिक समाजवादी पार्टी, ऋषि कट्टेल नेतृत्वको नेकपा, धर्मेन्द्र बास्तोला नेतृत्वको नेकपा बहुमत, विप्लव नेतृत्वको नेकपा र आहूती नेतृत्वको वैज्ञानिक समाजवादी पार्टीका नेतासँग राष्ट्रपतिले नागरिकता विधेयकबारे छलफल गर्नुभयो । यसैगरी उहाँले नेपाल मजदुर किसान पार्टीका नेताहरुसँग पनि छलफल गर्नुभयो ।
भेटमा वाम दलका नेताले राष्ट्रपतिले नागरिकता विधेयकमा राखेको अडानको प्रशंशा गरेका थिए । उनीहरुले विधेयक जस्ताको तस्तै राष्ट्रपतिलाई फर्काइनु गलत भएको बताएका थिए । त्यसक्रममा राष्ट्रपति भण्डारीले संविधानको दायराभित्र रहेर नागरिकता विधेयकबारे समाधान हुनुपर्ने पक्षमा आफू रहेको बताउनुभयो ।
राष्ट्रपति भण्डारीले गत साउन १५ गते संघीय संसदबाट जारी नागरिकता विधेयक फिर्ता गर्दै विभिन्न १५ बुँदे प्रश्न उठाउनुभएको थियो । तर, राष्ट्रपतिले दिएका सुझावलाई वेवास्ता गर्दै संघीय संसदका दुवै सदनले पुनः नागरिकता विधेयक जस्ताको तस्तै पारित गरेका छन् ।
पहिलो पटक संसदका दुवै सदनले पारित गरेको नागरिकता विधेयकलाई राष्ट्रपतिले आफ्ना सुझावसहित पुनर्विचारका लागि फिर्ता पठाइदिएपनि पुनः सो विधेयक जस्ताको तस्तै दुवै सदनले पास गरेपछि राष्ट्रपतिले थप परामर्श लिइरहनुभएको छ ।
यही भदौ १७ गते राष्ट्रिय सभाबाट पारित भएको विधेयक प्रमाणीकरणका लागि राष्ट्रपति समक्ष पेश भइसकेके छ । संसदले प्रमाणीकरणका लागि विधेयक पठाएको १५ दिनभित्र राष्ट्रपतिले विधेयक अनुमोदन गर्नुपर्ने कानुनी ब्यवस्था गरेको छ । राष्ट्रपतिले प्रमाणीकरण गरेपछि विधेयक ऐन बन्नेछ ।
नेपाल प्रहरी, सशस्त्र प्रहरीका पूर्व अधिकारीसँग छलफल हुने
उहाँले भोलि नेपाल प्रहरी र सशस्त्र प्रहरीका गरी एकसय भन्दा बढी पूर्व उच्च सुरक्षाकर्मीसँग नागरिकता विधेयकबारे परामर्श गर्नुहुने भएको छ ।
त्यसैगरी राष्ट्रपतिले पूर्वप्रमुख निर्वाचन आयुक्तहरुसँग पनि छलफल गर्ने कार्यक्रम छ ।
भोलि नै जनता समाजवादी पार्टीका अध्यक्ष उपेन्द्र यादवसँग पनि विधेयकबारे छलफल गर्ने कार्यक्रम छ । यादवले नागरिकता विधेयक राष्ट्रपतिले प्रमाणीकरण नगरेकोमा आपत्ति जनाएका थिए।
राष्ट्रपति भण्डारीले नागरिकता विधेयकका सन्दर्भमा विभिन्न राजनीतिक दलका नेताहरुलाई छुट्टाछुटै बोलाएर छलफल गरिरहनुभएको छ ।
राष्ट्रिय जनमोर्चाका नेताहरुसँग राष्ट्रपति भण्डारीले परामर्श लिइसक्नुभएको छ ।
