काठमाडौँ । नेपाल बिद्युत् प्राधिकरण बागमती प्रदेश डिभिजन कार्यालय हेटौँडाले बिद्युत् महसुल नतिर्ने छ हजार चार सय ७७ ग्राहक बिद्युत् लाइन काटिदिएको छ ।

लामो समयदेखि पटक पटक ताकेता गर्दासमेत महशुल नतिर्ने ती ग्राहकको आर्थिक वर्ष २०७८÷७९ मा प्राधिकरणले बिद्युत् बन्द गरिदिएको हो ।

कार्यालय प्रमुख दीपेन्द्रराज द्विवेदीका अनुसार बिद्युत् लाइन काटेर कारबाही गरेपछि तिनीबाट रु १७ करोड ५१ लाख २८ हजार जरिवानासहित बिद्युत् महसुल उठेको छ । तीमध्ये सोही अवधिमा पाँच हजार सात सय ७६ ग्राहकको लाइन जोडिएको बताइएको छ । लाइन काटिएकाबाट कुल उठ्नुपर्ने रकम १९ करोड, ९५ लाख ७७ हजार दुई सय आठ रहेको थियो ।

उक्त कारबाही सो प्रदेश कार्यालयअन्तर्गतको हेटौँडा वितरण केन्द्र, टाडी वितरण केन्द्र, भरतपुर वितरण केन्द्र, चनौली वितरण केन्द्र, सिन्धुली वितरण केन्द्र तथा पालुङ वितरण केन्द्रले बिद्युत् सेवा लिएर महसुल नबुझाएपछि कारबाही गरेएको सो कार्यालयबाट प्राप्त विवरणमा उल्लेख गरिएको छ ।

ती कार्यालयबाट बिद्युत् चोरी गर्ने गत आर्थिक वर्ष ०७८÷७९ मा एक सय ९४ ग्राहकलाई कारबाही गरी रु २१ लाख ४२ हजार चार सय ५४ जरिवाना सङ्कलन गरेको भएको थियो ।

त्यस्तै, विभिन्न कारणले हुने बिद्युत् चुहावट पनि अघिल्लो वर्षको तुलनामा कम भएको सो प्रदेश कार्यालयले जनाएको छ । अघिल्लो आर्थिक वर्ष २०७७÷७८ को तुलनामा गत आर्थिक वर्षमा बिद्युत् चुहावट घटेको हो । बिद्युत् चुहावट अघिल्लो वर्षमा ७ दशमलव ७२ प्रतिशत थियो भने गत आर्थिक वर्षमा घटेर ७ दशमलव ३७ प्रतिशतमा झरेको हो ।

ती कार्यालयमा विगतका तुलनामा बिद्युत् ग्राहक सङ्ख्या बढेर यस वर्ष तीन लाख तीन हजार आठ सय ४५ भएको बताइएको छ । सो अवधिमा ७३ करोड २९ लाख २१ हजार युनिट बिद्युत् महसुल बिक्री भएको र त्यसबापत् रु पाँच अर्ब ७६ करोड ६० लाख १७ हजार बिद्युत् महसुल सङ्कलन भएको सो प्रदेश कार्यालयका लेखा प्रमुख सञ्जयकुमार श्रेष्ठले जानकारी दिनुभयो अर्थात् ९४ दशमलव ३७ प्रतिशत बिद्युत् महसुल सङ्कलन भएको हो ।

सो कार्यालयअन्तर्गतको बिद्युत् चुहावट घट्दै गएको प्रदेश डिभिजन कार्यालयको तथ्याङ्कमा उल्लेख गरिएको छ । प्राप्त विवरणानुसार हेटौँडा वितरण केन्द्रको अघिल्लो आर्थिक वर्षमा ५ दशमलव ११ प्रतिशत चुहावट थियो भने गत आर्थिक वर्षमा ३ दशमलव १५ प्रतिशतमा झरेको, पालुङ वितरण केन्द्रको अघिल्लो आर्थिक वर्षमा २६ दशमलव ५५ प्रतिशत बिद्युत् चुहावट थियो भने गत आर्थिक वर्षमा २५ दशमलव ९२ प्रतिशतमा झरेको, टाँडी वितरण केन्द्रको अघिल्लो आर्थिक वर्षमा १२ दशमलव २७ प्रतिशतबाट गत आर्थिक वर्षमा १२ दशमलव १८ प्रतिशतमा चुहावट झरेको बताइएको छ ।

त्यस्तै, भरतपुर डिभिजन केन्द्रको अघिल्लो आर्थिक वर्षमा बिद्युत् चुहावट ५ दशमलव ४८ प्रतिशत थियो भने गत आर्थिक वर्षमा ५ दशमलव ४५ प्रतिशतमा झरेको, चनौली वितरण केन्द्रको अघिल्लो आर्थिक वर्षमा १४ दशमलव ५१ प्रतिशत चुहावट थियो भने गत आवमा २० दशमलव ९१ प्रतिशतमा झरेको तथा सिन्धुली बिद्युत् वितरण केन्द्रको अघिल्लो आर्थिक वर्षमा बिद्युत् चुहावट १६ दशमलव ५२ प्रतिशत थियो भने गत आवमा ११ दशमलव ९८ प्रतिशतमा बिद्युत् चुहावट झरेको प्राप्त विवरणमा बताइएको छ ।