काठमाडौं । पाँचदलीय गठबन्धन सिट बाँडफाँट कार्यदलले सिट बाँडफाँटका विभिन्न मोडालिटीबारे छलफल गरेको छ ।
प्रधानमन्त्री निवास बालुवाटारमा बिहीबार बसेको बैठकले सिट बाँडफाँटका तीन मोडालिटीबारे छलफल गरेको एक नेताले बताए ।
बैठकमा सहभागी ती नेताका अनुसार पहिलो–प्रत्यक्षमा पाएको मत र जितेको सिट, दोस्रो– समानुपातिकमा पाएको मत र तेस्रो–शीर्षसहितका प्रभावशाली नेताहरुलाई संसदमा ल्याउने गरी छलफल भएको हो ।
राष्ट्रिय जनमोर्चा तथा कार्यदलका नेता आनन्द शर्माले आजको बैठकमा ठोस निणर्य नभए पनि सकारात्मक रहेको बताउनु भयो । भागवण्डाको विषयमा अझ गृहकार्य गरेर अगाडि बढ्ने गरी ३० गते बैठक बसेर थप छलफल हुने शर्माले बताउनु भयो ।
यसअघि बसेको गठबन्धनका शीर्षनेताको बैठकले पाँचै दलका नेता सम्मिलित ११ सदस्यीय उक्त कार्यदल गठन गरेको थियो । कार्यदलमा कांग्रेसबाट महामन्त्री गगनकुमार थापा, नेता कृष्णप्रसाद सिटौला र सञ्चार तथा सूचना प्रविधिमन्त्री एवं पार्टीका नेता ज्ञानेन्द्रबहादुर कार्की हुनुहुन्छ भने नेकपा (माओवादी केन्द्र) बाट नेताहरू वर्षमान पुन र देव गुरुङ हुनुहुन्छ ।
यसैगरी राष्ट्रिय जनमोर्चाबाट हिमलाल पुरी र आनन्द शर्मा, नेकपा (एकीकृत समाजवादी) बाट उपाध्यक्ष प्रमेश हमाल र महासचिव बेदुराम भुसाल तथा जनता समाजवादी पार्टी नेपालबाट नेताहरू रामसहायप्रसाद यादव र रकम चेम्जोङ कार्यदल सदस्य हुनुुहुन्छ । यही साउन २३ गते बसेको पहिलो बैठकले कार्यदलको संयोजकमा कांग्रेसका पूर्वमहामन्त्री सिटौलालाई चयन गरेको थियो ।
