काठमाडौं । नेपाल प्रहरीका चार जना महिला वरिष्ठ उपरीक्षक (एसएसपी) एकैचोटी नायव महानिरीक्षक (डीआईजी)मा सिफारिस भएका छन् । बुधबार साँझ बढुवा समितिले सिफारिस गरेको १७ जना डीआईजीमध्ये चार जना महिला छन् ।
गृह मन्त्रालयको बढुवा सिफारिस समितिले बुधबार साँझ गरेको नेपाल प्रहरीका १७ जना एसएसपीको बढुवा सिफारिसमा एकैपटक चार जना महिना परेका हुन् । चार महिला एसएसपीलाई एकैसाथ डीआईजीमा बढुवा सिफारिस गरिएको यो पहिलो हो ।
बढुवा सिफारिसमा पर्नेमा किरण बज्राचार्य, मीरा चौधरी, दुर्गा सिंह र किरण राना रहेका छन्।
उनीहरू चारै जनाको आईजीपी बन्ने सम्भावना कायम छ। प्रहरीमा हालसम्म एकैपटक दुईजना महिला अधिकृतमात्र डीआईजी बनेका छन्। यसअघि, पार्वती थापा र विमला थापा एकसाथ डीआईजी भएका थिए।
अहिले चार जना डीआईजी सिफारिस भएसँगै प्रहरीमा नयाँ इतिहास बनेको छ। प्रहरीमा हालसम्म महिला आईजीपी नियुक्त भएका छैनन्।
बुधबार बसेको बढुवा सिफारिस समितिले लामो समयदेखि रिक्त रहेको डीआइजी पदको लागि बढुवा सिफारिस गर्ने निर्णय गरेको हो।
बढुवाको पहिलो नम्बरमा काठमाडौँ उपत्यका अपराध अनुसन्धान कार्यालय प्रमुख वसन्तबहादुर कुँवर परेका छन्। दोस्रो नम्बरमा मानवबेचबिखन अनुसन्धान ब्युरो प्रमुख टेकप्रसाद राई, तेस्रोमा कार्यविभाका अशोक सिंह, चौथोमा मानवस्रोत विकास विभाग, वृत्ति विकास महाशाखाका दिपक थापा र पाँचौंमा विपद व्यवस्थापन कार्यालय सामाखुसीका श्यामलाल ज्ञवालीको बढुवा सिफारिस भएको हो।
बढुवा सिफारिस भएका अन्यमा किरण बज्राचार्य, सन्दीप भण्डारी, सुदीप गिरी, मीरा चौधरी, टेकप्रसाद तामाङ, उमेशराज जोशी, भीमप्रसाद ढकाल, रामदत्त जोशी, पोषराज पोखरेल, बुद्धिराज गुरुङ, दुर्गा सिंह र किरण राणा छन्।
