बुटवल । लुम्बिनी प्रदेशका स्वास्थ्य जनसंख्या तथा परिवार कल्याण राज्यमन्त्री विमलाकुमारी वली खत्रीको घटनाबारे बुझ्न प्रदेश सरकारले कार्यदल बनाएको छ।
बु्धबार बसेको प्रदेश मन्त्रिपरिषदको बैठकले आन्तरिक मामिला तथा सञ्चारमन्त्री तिलकराम शर्माको संयोजकत्वमा ३ सदस्यीय कार्यदल बनाएको हो । समितिको सदस्यमा महिला, बालबालिका तथा कानूनमन्त्री रमा घर्तीमगर, र मुख्य न्यायाधीवक्ता श्रीकृष्ण सुवेदी रहेका छन् ।
मंगलबार दाङको तुल्सीपुर उपमहानगरपालिका–५ स्थित एकराज बस्नेतको घरमा गएर विवाद गरेपछि प्रहरीले राज्यमन्त्री वलीलाई नियन्त्रणमा लिएको थियो ।
एकराजकी पत्नी मिना भण्डारीले पनि आफू र छोरीलाई वलीले कुटपिट गरेको भन्दै प्रहरीमा उजुरी दिएकी थिइन् । राज्यमन्त्री वलीलाई बुटवल ल्याएर अस्पतालमा भर्ना गरिएको छ । अहिले उनी लुम्बिनी प्रादेशिक अस्पतालमा उपचाररत छन् ।
प्रदेश सभा बैठक अवरुद्ध
यता, नेकपा (एमाले)ले राज्यमन्त्री वलीको घटनाबारे प्रदेश सरकारको धारणा माग गर्दै संसद अवरुद्ध गरेको छ । बुधबार दिउँसो ४ बजे बसेको प्रदेश सभाको बैठकमा बजेट प्रस्तुत गर्ने कार्यसूचि थियो ।
बैठक सुरु हुने वित्तिकै विपक्षी एमालेका प्रमुख सचेतक भूमिश्वर ढकालले राज्यमन्त्री वलीको घट्नाका सम्बन्धमा प्रदेश सरकारले आफ्नो धारणा सार्वजनिक नगर्दासम्म प्रदेश सभा बैठक चल्न नदिने बताए। वलीको घटनाले प्रदेश सांसदहरु मात्र नभई समग्र लुम्बिनी प्रदेशबासीको शिर निहुरिएको उनले बताए ।
