पाल्पा । पाल्पाको रम्भा गाउँपालिकाको मत गणनास्थलमा झडप भएको छ। वडा नं ५ को मत गणनाका क्रममा खसेको भन्दा ७४ मत बढी भेटिएपछि झडप भएको हो ।
उक्त वडामा १ हजार ९२२ मत खसेको भनिएपनि गणनाको क्रममा १ हजार ९९६ मत भेटिएको थियो ।
गठबन्धनका कार्यकर्ताले पुनः मतदानको माग गर्दै नाराजुलुस गर्दै ढुंगामुढा गर्न थालेपछि झडप भएको प्रहरीले जनाएको छ ।  झडपका क्रममा नेपाल प्रहरी र सशस्त्र प्रहरीले अश्रुग्यास प्रहार गरेको छ ।
झडपमा ४ प्रहरी र २ कार्यकर्ता घाइते भएका छन् । सशस्त्र प्रहरी निरीक्षक हरि पोख्रेल, सशस्त्र प्रहरीका हवल्दार बिलबहादुर थापा, नेपाल प्रहरीका हवल्दार कृष्ण कुँवर र म्यादी प्रहरी हकेन्द्र गाहा घाइते भएका छन् ।
यस्तै रम्भा गाउँपालिका १ का बासुदेव गाहा र ३ का सुशन गाहा घाइते भएका छन् ।