काठमाडौं । राष्ट्रिय जनमोर्चा, काठमाडौं जिल्ला समितिले चन्द्रागिरी नगरपालिकामा विपक्षीले भ्रम छरेको आरोप लगाएको छ ।
बिहीबार एक विज्ञप्ति प्रकाशित गरी राजमोले गठबन्धनको पक्षमा जनमत बढेको देखेर विपक्षी अत्तालिएको टिप्पणी गरेको हो ।
चन्द्रागिरी नगरपालिकामा पाँचदलीय गठबन्धनको तर्फबाट उपप्रमुखका उम्मेदवार रोसन दानीले उम्मेदवारी फिर्ता लिएको भन्दै भ्रम छरिएको आरोप सो दल र उम्मेदवार दानीले लगाएका छन् ।
राजमो काठमाडौंका अध्यक्ष झविन्द्र बेलबासेद्वारा जारी विज्ञप्तिमा गठबन्धनको तर्फबाट उपप्रमुखका उम्मेदवार रोसन दानीको उम्मेदवारी यथावत रहेकोले कुनै भ्रममा नपर्न आग्रह गरिएको छ ।
यसअघि दानीले पनि युगदर्शनसँग कुरा गर्दै भ्रममा नपर्न आग्रह गर्नुभएको थियो ।
चन्द्रागिरीमा पाँचदलीय गठबन्धनको तर्फबाट प्रमुखमा नेपाली कांग्रेसका घनश्याम गिरी र उपप्रमुखमा जनमोर्चाका दानी उम्मेदवार हुनुहुन्छ ।
