काठमाडौं । राष्ट्रिय जनमोर्चाका अध्यक्ष चित्रबहादुर केसीले गठबन्धनलाई भोट नदिनु बेइमानी भएको बताउनुभएको छ ।
शुक्रबार काठमाडौंमा आयोजित पाँच दलिय गठबन्धनको चुनावी सभालाई सम्बोधन गर्दै अध्यक्ष केसीले जनमोर्चा सत्तारुढ गठबन्धनमा सहभागी भएकोमा कतिपयले विरोध गर्ने गरेको बताउनुभयो ।
आफुले विगतमा पनि गिरिजाबाबु, गणेशमान लगायतसँग सहकार्य गरेको अध्यक्ष केसीले स्मरण गर्नुभयो । उहाँले आफ्नो पार्टी प्रतिनिधि सभा विघटन भएदेखि नै गठबन्धनको पक्षमा रहेको स्पष्ट पार्नुभयो ।
उहाँले भन्नुभयो, ‘गठबन्धन भनेको मिलेको कुरामा मात्रै मिलेर जाने हो नि । यहाँ अरु भएका बाँकी साथीहरुले एमसीसी पास गर्नुभयो । राष्ट्रिय जनमोर्चाले मान्दै मानेन । नमान्ने अधिकार छ नि हामीसँग । त्यसपछि एमसीसीमा सामेल नहुने फेरि पाँचदलीय गठबन्धनभित्र राष्ट्रिय जनमोर्चा गयो, बिक्यो, सक्कियो । चित्रबहादुरको टाउकामा रुख समेत चिन्ह लाएर यहाँ प्रचार गरिराखेका छन् । ति प्रतिगामीका मतियार हुन् । चित्रबहादुर गिरिजाबाबुसँग पनि गठबन्धन गरेर हिडेको छ । भट्टराईसँग हिडेको छ । गणेशमानजीसँग हिडेको छ । पछिल्लो पटक रामचन्द्रजी, शेरबहादुरजीसँग पनि राष्ट्रिय जनमोर्चा हिँडीराखेको छ त । सँगै कार्यगत एकता गर्नुभनेको सबै कुरा स्वीकारेर हो ? गठबन्धन भनेको भिन्न मत भएरपनि मिलेको कुरामा सहकार्य गर्ने हो । एकता गर्ने हो ।’
अध्यक्ष केसीले गठबन्धनका उम्मेदवारहरुलाई जनमोर्चाले इमान्दारीतापूर्वक सहयोग गर्ने उल्लेख गर्दै आफ्ना उम्मेदवार भएको ठाउँमा पनि गठबन्धनका सबैले सहयोग गर्न उहाँले आग्रह गर्नुभयो ।
उहाँले भन्नुभयो, ‘महानगरपालिकामा देशभरी गठबन्धनका उम्मेदवार साथीहरु जहाँ हुनुहुन्छ, राष्ट्रिय जनमोर्चाले इमान्दारीपूर्वक सहयोग गर्छ । त्यसमा तलमाथि हुन सक्दैन । तलमाथि गर्नु भनेको बेइमानी हो । यस्तो दिन भोली आउन्न र ? गठबन्धन भन्दा बलियो छ प्रतिगमन यो पनि बुझिराख्नुस् । नेपालमा प्रतिगमन एक्लै छैन । ऊ अहिले पनि शक्तिशाली छ ।’
उहाँले वर्तमान सत्तारुढ गठबन्धन भन्दा प्रतिगमन बलियो भएकाले सजग रहनुपर्ने बताउनुभयो ।
