श्यामलाल पोखरेल,बुटवल ।
‘संसारका मजदुर एक होऔं’ भन्ने आह्वानका साथ अखिल नेपाल ट्रेड युनियन महासंघ (अन्टुक) रुपन्देहीले १३३ औं अन्तर्राष्टिय मे दिवस मनाएको छ। अन्टुकले रुपन्देहीको बुटवलस्थित राष्ट्रिय जनमोर्चाको कार्यालयमा मजदुर दिवस मनाएको हो।

कार्यक्रममा बोल्दै राष्ट्रिय जनमोर्चा अध्यक्ष चित्रबहादुर केसीले अहिलेको राज्य व्यवस्था गरिब, निमुखा र मजदुरको पक्षमा नभएको बताउनु भयो।

उहाँले श्रम गरेर खाने वर्गका समस्या समाधानका लागि जनवादी क्रान्तिमार्फत जनताको राज्य व्यवस्था कायम गर्नुपर्नेमा जोड दिनुभयो। अहिलेको पुँजीवादी व्यवस्थाले गरिब निमुखा तथा मजदुरको हितमा काम गर्न नसक्ने भएकाले मजदुर वर्गको अधिकार सुनिश्चित गर्न मजदुर आन्दोलनालाई शसक्त बनाउनुपर्ने बताउनु भयो ।

सन् १८८६ मा अमेरिकाको शिकाकोगो सहरमा लाखौंलाख मजदुरहरु आन्दोलनमा उत्रिएपछि साम्राज्यवादी शक्ति झुकेको बताउँँदै पुँजीवादी तथा साम्राज्यवादी शक्तिका विरुद्व मजदुर आन्दोलन जरुरी रहेको अध्यक्ष केसीको भनाइ छ ।
अध्यक्ष केसीले परिवर्तनका उपलब्धीलाई संरक्षण गर्नका लागि ओलीको प्रतिगमनका विरुद्ध कांग्रेस लगायतका पार्टीहरुसँग चुनावी गठबन्धन गर्नुपरेको बताउनु भयो । उहाँले अहिलेको गठबन्धन परिस्थितिले बनाएको बताउँदै स्थानीय तहको निर्वाचनमा आफ्ना उम्मेदवारलाई जिताउने गरी जनताको घरदैलोमा जान आग्रह गर्नुभयो ।
संघीयता असफल भैसकेको बताउँदै संघीयताले संकटमा परेको नेपालको आर्थिक अवस्था र राष्ट्रियता एमसीसी परियोजनाले झनै संकटमा पर्ने बताउनु भयो ।

एमसीसी परियोजना नेपाल र नेपालीको हितमा नभएकाले संघीयता र एमसीसी खारेजी गर्नुको अर्को कुनै विकल्प नभएको अध्यक्ष केसीको दाबी छ।

अखिल नेपाल टे«ड युनियन महासंघ (अन्टुक) का केन्द्रीय अध्यक्ष लोकराज भुसालले पुँजीपति वर्ग मजदुर वर्गलाई अधिकार दिने पक्षमा नभएको भन्दै हक अधिकार प्राप्तिका लागि मजदुर एकता जरुरी रहेको बताउनुभयो ।
मजदुर आन्दोलनलाई व्यवस्थित गर्नुपर्नेमा उहाँले जोड दिनुभयो ।

कार्यक्रममा राष्ट्रिय जनमोर्चाका रुपन्देही अध्यक्ष बद्रे आलम, राष्ट्रिय जनमोर्चा लुम्बिनी प्रदेश कोषाध्यक्ष गणेश गौतम, ढुण्डिराज शर्मा, सागर बेल्वासे लगायतले बोल्दै मजदुर वर्गले उत्पादन तथा निमार्ण गरेको वस्तु मजदुर वर्गले प्रयोग गर्न नपाएको बताउनु भयो ।

लोकराज भुसालको अध्यक्षता र गंगालाल सापकोटाको सञ्चालनमा कार्यक्रम सम्पन्न भएको थियो ।