महेन्द्रनगर । राष्ट्रिय जनमोर्चा, कञ्चनपुरले थप नौ जना वडाअध्यक्षका उम्मेदवारको घोषणा गरेको छ । जिल्ला अध्यक्ष रामबहादुर कार्कीले बिहीबार विभिन्न पालिकाका गरी नौ जना वडाअध्यक्षको नाम सार्वजनिक गर्नुभएको हो ।
राजमो कञ्चनपुरले थप सार्वजनिक गरेका वडाअध्यक्ष उम्मेदवारहरुमा बेलडाँडी गाउँपालिकामा दुई जना, बेलौरी नगरपालिकामा १ जना, शुक्लाफाँटा नगरपालिकामा चार जना र बेतकोट नगरपालिकामा दुई जना रहेका छन् ।
यसअघि राजमो कञ्चनपुरले विभिन्न पालिकामा गरी १९ जना वडाअध्यक्षका उम्मेदवारको नाम सार्वजनिक गरेको थियो । बाँकी स्थानमा पुनः चयन गरिने अध्यक्ष कार्कीले जानकारी दिनुभयो ।
राजमो कञ्चनपुरले गठबन्धन दलहरुबीच सहकार्यका लागि अधिकतम प्रयत्न गर्ने र एकल उम्मेदवारीको लागि पनि तयारी गरिरहेको जनाएको छ ।
राजमोले संघीयता र एमसीसीको खारेजी, महंगी भ्रष्टाचार एवम् अनियमितताका विरुद्ध संघर्ष गर्न र राष्ट्रियता, गणतन्त्रको रक्षा र स्थानीय विकासका लागि जनमोर्चालाई मतदान गर्न आग्रह गरेको छ ।
