डम्मरबहादुर कार्की, काठमाडौँ ।
आगामी वैशाख ३० गते हुने स्थानीय तहको निर्वाचनमा बागलुङमा नेपाली कांग्रेस, नेकपा माओवादी केन्द्र, नेकपा एकीकृत समाजवादी, राष्ट्रिय जनमोर्चा र जनता समाजवादी पार्टीसहित पाँच दलको चुनावी गठबन्धन हुने भएको छ ।
आइतबार नेपाली कांग्रेस जिल्ला सभापति जीत शेरचनको अध्यक्षतामा बसेको बैठकले स्थानीय तहको निर्वाचनमा पालिका स्तरदेखि वडा तहसम्म एक भएर अगाडि बढ्ने निर्णय गरेको हो ।
बैठकले सबै दलका एक एक जना प्रतिनिधी रहने गरी पाँच सदस्यीय कार्यदलसमेत निर्माण गरेको छ । कार्यदलमा नेपाली कांग्रेसका जिल्ला सचिव हरिहर शर्मा, नेकपा माओवादी केन्द्रका जिल्ला संयोजक ज्ञामनाथ गैरे, नेकपा एकीकृत समाजवादीका गोविन्द गौतम, जनता समाजवादीका कृष्ण शर्मा र राष्ट्रिय जनमोर्चाका जिल्ला सचिव भिमलाल पोखरेल रहनुभएको छ । कार्यदलले वडा तहसम्म अध्ययन गरी आगामी चैत २२ गते भित्र केन्द्रमा प्रतिवेदन बुझाउने छ।
यस्तै, जिल्लामा निर्वाचनका लागि सैद्धान्तिक र नीतिगत छलफल गर्न एक राजनैतिक दलबाट २ जना प्रतिनिधि रहने गरी १० जनाको कार्यदल समेत निर्माण गरिने छ । त्यसका लागि हरेक दलले दुई/दुई जनाको नाम सिफारिस गर्ने नेकपा माओवादी केन्द्रका जिल्ला इन्चार्ज बलावती शर्माले जानकारी दिनुभयो ।
जिल्ला तहमा कुन ठाँउमा कसले नेतृत्व गर्ने भन्ने विषयमा भने अहिले निर्णय भएको छैन । निर्वाचनमा तल्लो तहसम्म नै अध्ययन गरेर जनताको भावना अनुसार उम्मेदवार छनौट हुने गरी संयन्त्र निर्माण गरिने बताइएको छ ।
आगामी दिनमा सोही अनुसार उम्मेदवारको टुंगो लाग्ने राष्ट्रिय जनमोर्चाका केन्द्रीय सदस्य राजेन्द्र ढुंगानाले जानकारी दिनुभयो । उहाँले केन्द्रीय निर्णयलाई स्वागत गर्दै जिल्लामा पनि गठबन्धनलाई प्रभावकारी बनाएर यो निर्वाचन गठबन्धनको पक्षमा लाग्ने गरी सबै राजनितिक दल लागेको बताउनुभयो ।
