कमल पौडेल, प्युठान ।
प्युठानको मल्लरानी गाउँपालिका वडा न. ५ रिठेखर्क गाउँका सबै गाउँबासी राष्ट्रिय जनमोर्चामा प्रवेश गरेका छन् ।
एमालेबाट निर्वाचित वडा अध्यक्ष राम बहादुर थापाले वडाबाट दिने सेवा सुविधामा गाउँँलाई विभेद गरेको भन्दै गाउँका ४२ घरधुरी राजमोमा प्रवेश गरेका हुन् ।
शनिबार राजमो ५ नम्बर वडा समितिले आयोजना गरेको चुनावी सभामा स्थानीयले राजमोको सदस्यता लिएर पार्टीमा समाहित भए । कार्यक्रममा राजमोका केन्द्रीय सदस्य तथा प्युठान जिल्ला अध्यक्ष कृष्ण खड्का, मल्लरानी गाउँपालिकाका अध्यक्ष अम्मरध्वज राना, उपाध्यक्ष सरिता जिसिले प्रशिक्षणात्मक मन्तव्य सहित नव प्रवेशीलाई स्वागत गर्नुभयो ।
कार्यक्रममा अखिल नेपाल युवक संघ केन्द्रीय सदस्य हुमलाल नेपाली, युवक संघका केन्द्रीय सदस्य तथा प्युठान जिल्ला अध्यक्ष कमल पौडेल, राजमो मल्लरानीका अध्यक्ष सूर्य बहादुर नेपाली, राजमो जिल्ला सदस्य गुणेन्द्र बस्नेत लगायत नेताहरुले शुभकामना दिनुभएको थियो ।
