बुटवल । राष्ट्रिय जनमोर्चाका अध्यक्ष चित्रबहादुर केसीले शासक दलहरु देशको राष्ट्रियता बचाउन भन्दा साम्राज्यवादीको दलाली गर्न तल्लिन भएको बताउनुभएको छ ।

रुपन्देहीको कञ्चन गाउँ पालिकामा सोमबार आयोजित राष्ट्रिय जनमोर्चाको स्थानीय चुनाव केन्द्रित भेलालाई सम्बोधन गर्दै अध्यक्ष केसीले राष्ट्रघाती एमसीसी पारित गर्न सत्ताधारी कांग्रेस, माओवादी र एकीकृत समाजवादी जत्तिकै प्रतिपक्षी एमाले पनि जिम्मेवार रहेको बताउनुभयो ।

केसी भन्नुभयो, ‘शासकहरू देशको हितमा काम गर्नुको सट्टा विदेशी साम्राज्यवादको दलाली गर्दैछन् । राष्ट्रघाती एमसीसी पास गर्न कांग्रेस, माओवादी र समाजवादी जति जिम्मेवार छन्, एमाले पनि उत्तिकै जिम्मेवार छ । प्रतिस्पर्धा खाली एमसीसी पास गरेर जस कसले लिने भन्ने हो ।’

अध्यक्ष केसीले अहिलेको निर्वाचन प्रतिगमनको खतरा र अधिनायकवादलाई रोक्न केन्द्रित गर्ने बताउनुभयो । साथसाथै आफ्नो पार्टीले एमसीसी र संघीयता खारेजीको मुद्दालाई पनि अघि बढाउने उहाँको भनाई थियो ।

‘गणतन्त्रको रक्षा गरौँ, धर्म निरपेक्षताको रक्षा गरौँ, संघीयताको खारेज गरौँ भन्ने नारालाई मूल नारा बनाएर स्थानीय चुनावमा जान्छौँ’ केसीले भन्नुभयो, ‘ अहिले पनि प्रतिगमनको खतरा कायमै छ । प्रतिगमन र अधिनायकवादको खतरालाई रोक्न अहिले पनि सरकारलाई सर्मथन गरेका हौँ ।’

भेलाको अध्यक्षता राजमो पालिका अध्यक्ष लिला बल्लभ खनालले गर्नु भएको थियो भने सञ्चालन राजमोका पालिका सचिव तुलसी राम शर्माले गर्नु भएको थियो ।

भेलालाई राष्ट्रिय सभा सदस्य तुल प्रसाद विक (राजेश), राष्ट्रिय जनमोर्चा जिल्ला अध्यक्ष बद्रे आलम, वामपन्थी नेता चेतनाथ आचार्यले पनि सम्बोधन गर्नु भएको थियो । स्वागत खोप बहादुर मगरले गर्नु भएको थियो ।

भेलाले कञ्चन गाउँपालिका राष्ट्रिय जनमोर्चाको पुनर्गठन गरेको छ । पुर्नगठित समितिमा अध्यक्ष लीला वल्लब खनाल, उपाध्यक्ष खोप बहादुर मगर, सचिव तुलसी राम शर्मा, सहसचिव छविलाल सुवेदी, कोषाध्यक्ष शिवलाल पौडेल रहनुभएको छ।

यस्तै, सदस्यहरूमा कोष प्रसाद शर्मा, उमा थापा, चित्र बहादुर क्षेत्री, राम प्रसाद ढुंगाना, भूमा खनाल, सन्त बहादुर सुनार, लालु राम पाण्डे, खड्ग बहादुर घर्ती क्षेत्री रहनुभएका छ । त्यसैगरी सल्लाहकारमा पदम मल्ल, विष्णु पुन, चिन्तामणि आचार्य, शान्ता जिसी र हिरादत्त ढुंगाना चुनिनुभएको छ ।

भेलाले यमबहादुर रायमाझीको संयोजकत्वमा सात सदस्यीय स्थानीय चुनाव परिचालन समिति र लीला वल्लब खनालको संयोजकत्वमा ४१ सदस्यीय प्रचार प्रसार समिति पनि गठन गरेको छ ।