बागलुङ बजार । बागलुङमा खाली गाडीमा बसेबापत् नेकपा (एमाले) मा प्रवेश गरेको प्रचार गरेको पाइएको छ । जिल्लाको दक्षिण भेगको बरेङ गाउँपालिकामा एमालेले यस खालको कार्य गरेको हो ।
बरेङ गाउँपालिका–५ सुखौराबाट २०७८ फागुन २१ गते एमालेको अधिवेशनमा आउने गाडीमा केही सिट खाली भएकाले पुरन सुनार, पदम नेपाली, पुरन सामत, राजु सामत र दलबहादुर सार्की चढेकोमा यस्तो प्रचार गरिएको थियो ।
उहाँहरू चारै जनाले २०७८ फागुन ३० गते प्रेसविज्ञप्ति जारी गर्दै आफूहरू राष्ट्रिय जनमोर्चा समर्थक भएको र खाली गाडीमा बसेर बरेङसम्म आएकै कारणले आफूहरूलाई एमालेमा प्रवेश गरेको भन्दै झुटो प्रचार गरिएको बताउनुभएको छ ।
उहाँहरूले आफूहरू सबै आफ्नो आस्थावान् पार्टी राष्ट्रिय जनमोर्चामै रहेको जानकारीसमेत गराउनुभएको छ ।
यस्तो छ, विज्ञप्तिको पूर्ण पाठ :
“प्रस्तुत विषयमा यही मिति २०७८।११।२१ गतेका दिन बरेङ गा.पा. स्तरीय नेकपा (एमाले) को प्रथम अधिवेशनमा बरेङ–५ सुखौराबाट केही एमाले समर्थक गाडीमा जाने क्रममा गाडी खाली भएकाले हामी तपसिलका व्यक्तिहरू सोही गाडीमा बरेङसम्म गएकाले हाम्रो नामसमेत घोषणा गरी राजमोबाट एमालेमा प्रवेश गरेको भनिएकाले हामीहरू नेकपा (एमाले) मा प्रवेश नगरी आफ्नो आस्थावान् पार्टी राष्ट्रिय जनमोर्चामै रहेको सबैलाई जानकारी गराउँदै भ्रममा नपर्नसमेत अनुरोध गर्दछौँ । त्यसका लागि यो संयुक्त विज्ञप्ति जारी गरेका छौँ ।”
