काठमाडौं । राष्ट्रिय जनमोर्चाले एमसीसीविरुद्ध फागुन १६ गते देशब्यापी बन्द सफल भएकोमा आम जनतालाई धन्यवाद दिएको छ ।
मंगलबार एक वक्तव्य प्रकाशित गरी राजमो उपाध्यक्ष एवम् प्रवक्ता दुर्गा पौडेलले ‘बन्दको सफलताले जनताको एमसीसीका विरुद्धको देशव्यापी भावना तथा देशको राष्ट्रियता, सार्वभौमिकता र राष्ट्रिय स्वाभिमानको उच्च भावनालाई पनि व्यक्त गर्दछ’ भन्नुभएको छ ।
साथै, राजमोले बन्दका क्रममा कतिपय स्थानमा विस्फोटक पदार्थ राखिएको र आगजनी गरिएको घटनाप्रति पार्टीको ध्यानाकर्षण भएको भन्दै सो कार्य आन्दोलनलाई कमजोर बनाउन घुसपैठियाहरुले गरेको आशंका व्यक्त गरेको छ ।
यस्तो छ वक्तव्य
यही २०७८ फागुन १६ गते ८ दलका तर्फबाट घोषित नेपाल बन्दको कार्यक्रम देशव्यापी रूपमा सफल भएकोमा हामीले सम्पूर्ण जनतालाई धन्यवाद दिन चाहन्छौँ । बन्दको सफलताले जनताको एमसीसीका विरुद्धको देशव्यापी भावना तथा देशको राष्ट्रियता, सार्वभौमिकता र राष्ट्रिय स्वाभिमानको उच्च भावनालाई पनि व्यक्त गर्दछ ।
उक्त बन्दको सिलसिलामा कतिपय स्थानहरूमा भएका आगलागीका घटना तथा कतिपय स्थानहरूमा विष्फोटक पदार्थ राखिएका घटनाहरूप्रति पनि हाम्रो ध्यान आकर्षित भएको छ । हामीले के स्पष्ट गर्न चाहन्छौँ भने हाम्रो बन्दको कार्यक्रम शान्तिपूर्ण थियो र त्यस दौरानमा भएका कतिपय आवाञ्छित गतिविधिहरू हाम्रो तर्फबाट नगरिएको तथा हाम्रो आन्दोलनलाई बदनाम वा कमजोर पार्न कतिपय घुसपैठियाहरूले गरेका कार्यहरू नै हुन् ।
त्यसका लागि हामी कुनै पनि प्रकारले जिम्मेवार नभएको कुरा हामीले स्पष्ट गर्न चाहन्छौँ । त्यस्ता घटनाहरू कोद्वारा गरिएका हुन् ? त्यसबारे आवश्यक छानबिन गरी प्रकाशमा ल्याउने जिम्मेवारी सरकारको नै हो र त्यसका लागि हामीले जोड पनि दिन्छौँ ।
२०७८ फागुन १७ गते
दुर्गा पौडेल
उपाध्यक्ष, प्रवक्ता तथा सांसद
