काठमाडौँ । प्रगतिशील लेखक सङ्घले केन्द्रीय सदस्य राजेश विश्वकर्मा राष्ट्रियसभाको सदस्यमा चुनिनुभएकोमा बधाई ज्ञापन गरेको छ । त्यस्तै, बैठकले सचिवालय सदस्य शालिकराम तिमिल्सिनासहित विभिन्न प्रलेससम्बद्ध साहित्यकारहरू शोकमा परेकोमा समवेदनासमेत प्रकट गरेको छ ।
२०७८ माघ १५ गते प्रलेस कार्यालयको बैठकले तिमिल्सिनासहित एघारौँ राष्ट्रिय सम्मेलनका अध्यक्ष मण्डलका सदस्य सरल सहयात्री, प्रलेसका पूर्व महासचिव मित्रलाल पङ्ज्ञानी र प्रलेसका पूर्वकेन्द्रीय सदस्य अनिल पौडेल शोकमा पर्नुभएकाले समवेदना प्रकट गरेको हो ।
अध्यक्ष प्राडा जीवेन्द्र देव गिरी र महासचिव समीर सिंहको हस्ताक्षरमा जारी सो प्रेसविज्ञप्तिमा भौतिक परिस्थितिको सहजता हेरी प्रदेशको जिल्ला सम्मेलन तथा सदस्यता अभियान सञ्चालन गर्ने जानकारी दिइएको छ ।
प्रेसविज्ञप्तिको पूर्ण पाठ यस्तो छ–
“प्रगतिशील लेखक सङ्घ नेपालको कार्यालयको २०७८ माघ १५ गते बसेको बैठकले सचिवालय सदस्य शालिकराम तिमिल्सिनालाई मातृशोक तथा एघारौँ राष्ट्रिय सम्मेलनका अध्यक्ष मण्डलका सदस्य सरल सहयात्रीलाई पितृशोक पर्न गएकोमा उहाँहरूलगायत शोकसन्तप्त परिवार जनमा हार्दिक समवेदना व्यक्त गरेको छ । यसरी नै पूर्व महासचिव मित्रलाल पङ्ज्ञानीकी हजुरआमाको निधनबाट शोकाकूल पङ्ज्ञानी तथा उहाँका परिवार जनमा पनि हार्दिक समवेदना प्रकट गरेको छ । युद्धप्रसाद मिश्र प्रतिष्ठानका अध्यक्ष तथा प्रलेसका पूर्वकेन्द्रीय सदस्य अनिल पौडेललाई पनि मातृशोक परेकोमा समवेदना प्रकट गर्दछ ।
बैठकले प्रलेसका केन्द्रीय सदस्य तथा रुपन्देही जिल्ला समितिका उपाध्यक्ष राजेश विश्वकर्मा राष्ट्रियसभा सदस्यमा निर्वाचित हुनुभएकोमा उहाँलाई हार्दिक बधाई ज्ञापन गरेको छ ।
बैठकले सहजताअनुसार जिल्ला सम्मेलन गर्ने तथा सदस्यता अभियानलाई तीव्र रूप दिने निर्णय गरेको छ ।”
