पाल्पा । आगामी माघ १२ गते हुने राष्ट्रिय सभा निर्वाचनका लागि लुम्बिनी प्रदेशमा गठबन्धनका उम्मेदवारहरुले पाल्पामा परिचयात्मक कार्यक्रम गरेका छन् । लुम्बिनी प्रदेशका जिल्लाहरुमा प्रचारप्रसार तथा मतदातासँग मत माग्ने क्रममा पाल्पामा सो कार्यक्रम गरिएको हो ।
पाँच दलीय गठबन्धनको संयुक्त टोली र पाल्पास्थित गठबन्धन सम्बद्ध दल, मतदाताहरु र सञ्चारकर्मीबीच सोमबार तानसेनमा परिचय कार्यक्रम सम्पन्न भएको हो। कार्यक्रममा गठबन्धनका साझा उमेदवारत्रय तुल प्रसाद विश्वकर्मा (राजेश), युवराज शर्मा र राजेन्द्रलक्ष्मी गैरेले आ–आफ्नो प्रतिबद्धता मन्तव्य राख्नु भएको थियो ।
कार्यक्रममा राष्ट्रिय जनमोर्चाका केन्द्रीय सदस्य सोम कुमार कार्की, नेकपा (एकीकृत समाजवादी) का केन्द्रीय नेता यादब बहादुर रायमाझी र नेकपा (माओवादी केन्द्र) का केन्द्रीय सदस्य अनिल किशोर घिमिरे लगायतले गठबन्धनका साझा उमेदवारहरुलाई बधाइ तथा शुभकामना दिनु भएको थियो ।
नेपाली कांग्रेस पाल्पाका सभापति हिमालदत्त श्रेष्ठको अध्यक्षतामा भएको कार्यक्रमको सञ्चालन राष्ट्रिय जनमोर्चा पाल्पाका अध्यक्ष विशाल दर्लामी र स्वागत माओवादी पाल्पाका अध्यक्ष नेत्र पाण्डेले गर्नु भएको थियो ।
सोमबार बुटवलमा पत्रकार सम्मेलन गरेर टोली पाल्पा पुगेको हो । मंगलबार गुल्मीको तम्घास, अर्घाखाँचीमा भेटघाट गर्ने कार्यतालिका गठबन्धनले बनाएको छ । त्यस्तै माघ ५ गते रोल्पा, ६ गते दाङको घोराही, ६ र ७ गते बर्दिया, ७ गते बाँके, ७ गते नै दाङको भालुवाङ, ८ गते कपिलवस्तुको चन्द्रौटा, रुपन्देहीको बुटवल र ९ गते नवलपरासीमा भेटघाट तथा चुनावी प्रचार कार्यक्रम राखिएको गठबन्धनले जनाएको छ ।
