काठमाडौं । नेपाली कांग्रेसको सभापति पदमा छ जनाको उम्मेदवारी परेको छ । कांग्रेसकाे जारी चौधौँ महाधिवेशनमा शनिबार ६ जनाले सभापतिका लागि उम्मेदवारी दर्ता गराएका हुन् ।
नयाँ कार्यकालका लागि वर्तमान सभापति शेरबहादुर देउवासहित शेखर कोइराला, प्रकाशमान सिंह, विमलेन्द्र निधि, कल्याण गुरुङ र युवराज न्यौपानेको उम्मेदवारी परेको हो।
देउवालाई कांग्रेस सभापतिका लागि तेस्रो धारका कृष्ण सिटौलाको साथ छ भने पौडेल समूह विभाजित भएको छ । असन्तुष्ट नेता रामचन्द्र पौडेल सभापतिको दौडबाट आफू अलग रहेको घोषणा गरिसक्नुभएको छ ।
पौडेल समूह विभाजित भएर दुईजना शेखर र प्रकाशमानको उम्मेदवारी परेको छ भने देउवा समूहबाट अलग्गिएका विमलेन्द्र निधिले पनि सभापतिमा उम्मेदवारी दिनुभएको छ ।
त्यसैगरी उपसभापतिमा देउवा समूहबाट पूर्णबहादुर खड्का र विजय गच्छदारको उम्मेदवारी परेको छ भने शेखर कोइराला समूहबाट उपसभापतिमा चन्द्र भण्डारी र धनराज गुरुङ मैदानमा उत्रिनुभएको छ ।
प्रकाशमान सिंह समूहबाट सुजाता कोइराला उपसभापति लड्नुहुने भएको छ । कोइराला परिवारका शेखरलाई साथ नदिइ उहाँ सिंह प्यानलमा पुग्नुभएको हो ।
त्यस्तै यही समूहबाट विश्वप्रकाश शर्मा महामन्त्रीमा उम्मेदवारी दिनुभएको छ । उता महामन्त्रीमा देउवा समूहबाट डा. प्रकाशशरण महत र देउवालाई सघाएका सिटौलाको तर्फबाट प्रदीप पौडेल पनि मैदानमा छन् ।
त्यस्तै शेखर समूहबाट महामन्त्रीमा डा. मिनेन्द्र रिजाल र गगन थापा मैदानमा उत्रिनुभएको छ । सहमहामन्त्रीमा विभिन्न समूहबाट गरी १३ जनाको उम्मेदवारी परेको छ ।
