काठमाडौं । पेट्रोलियम पदार्थमा गरिएको मूल्यवृद्धिविरुद्ध आन्दोलन अखिल (छैठौं) सहित ६ विद्यार्थी संगठनहरुले थप आन्दोलनको कार्यक्रम घोषणा गरेका छन् । बिहीबार अखिल (क्रान्तिकारी) को कार्यालयमा बसेको बैठकले आन्दोलनका थप कार्यक्रम घोषणा गरेको हो ।
घोषित कार्यक्रम अनुसार आज (मंसिर ३) र भोलि सबै राजनीतिक दलका शीर्ष नेताहरुलाई ज्ञापन पत्र बुझाउने, मंसिर ५ गते प्रमुख क्यापस र जिल्लाहरुमा संयुक्त विरोध प्रदर्शन गर्ने तथा ७ गते ‘एक व्यक्ति एक रुपैयाँ’ संकलन गरी आयल निगमलाई बुझाउने कार्यक्रम रहेको छ ।
अखिल (छैठौं) का अध्यक्ष देवेन्द्र कुँवरले आज नेकपा (क्रान्तिकारी माओवादी) का महासचिव मोहन वैद्य र देजमोका अध्यक्ष सिपी गजुरेलसँग भेट तय भइसकेको र आज र भोलिमा सबै प्रमुख दलका शीर्ष नेतालाई भेटेर ज्ञापनपत्र बुझाइने जानकारी दिनुभयो ।
नेपाल आयल निगमले गएको कात्तिक २४ गतेदेखि पेट्रोल, डिजल, मट्टितेल र खाना पकाउने ग्यासमा चर्को मूल्यवृद्धि गरेपछि ६ विद्यार्थी संगठनले आन्दोलन घोषणा गरेका थिए । विद्यार्थी संगठनहरुले पेट्रोलियम पदार्थमा गरिएको मूल्यवृद्धिविरुद्ध आयल निगम घेराउ गर्नुका साथै खाली सिलिण्डरको प्रदर्शनलगायतका विरोध कार्यक्रम गरेका छन् ।
मूल्यवृद्धिविरुद्ध अखिल (छैठौं), अखिल (क्रान्तिकारी), अनेरास्ववियु, समाजवादी विद्यार्थी युनियन, वैद्य निकट अखिल क्रान्तिकारी र विप्लव निकट अखिल क्रान्तिकारीले संयुक्त आन्दोलन गरिरहेका छन् ।
यो पनि :
मूल्यवृद्धि विरुद्ध आन्दोलन चर्काउँदै विद्यार्थी संगठनहरू
मूल्य वृद्धिको विरोधमा विद्यार्थीद्वारा खाली सिलिन्डर प्रदर्शन
