काठमाडौँ । राष्ट्रिय पुनर्निर्माण प्राधिकरणले पुनर्निर्माणसम्बन्धी अन्तर्राष्ट्रिय सम्मेलन आयोजना गर्ने भएको छ ।
प्राधिकरणले आगामी मङ्सिर २१ गतेदेखि २३ गतेसम्म काठमाडौँमा नेपालको पुनर्निर्माणसम्बन्धी अन्तर्राष्ट्रिय सम्मेलन गर्ने भएको हो ।
‘पुनर्निर्माणबाट उत्थानशीलतातर्फ’ मूल नारा तय गरी हुन लागेको सम्मेलनमा निजी आवास पुनर्निर्माण, सांस्कृतिक सम्पदा पुनर्निर्माण, सार्वजनिक पूर्वाधार पुनर्निर्माण, जीविकोपार्जन तथा आर्थिक पुनस्र्थापना र सुशासनका विभिन्न पक्षमा गरिएका अनुसन्धानमूलक प्रस्तुतिका साथै विषयगत गोष्ठीहरू गरिने राष्ट्रिय पुनर्निर्माण प्राधिकरणले जनाएको छ ।
सम्मेलनमा स्वदेशी तथा विदेशी पाहुना, विषय विज्ञ तथा विभिन्न सङ्घसंस्थाका प्रतिनिधिलाई निमन्त्रणा गरिएको बताइएको छ ।
राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले पुनर्निर्माणको सम्बन्धमा नेपालले प्राप्त गरेका अनुभव र सिकाइ अन्तर्राष्ट्रिय समुदायलाई बाँड्ने र आगामी दिनमा नेपाललाई बिपत्बाट बचाउनका लागि नेपालको मार्गचित्र के हो भन्ने विषय प्रस्तुत गर्नु सम्मेलनको मुख्य उद्देश्य रहेको बताउनुभयो ।
‘हामीले दुईओटा मूल उद्देश्य राखेर यो सम्मेलन गर्दै छौँ : एउटा, हामीले प्राप्त गरेका अनुभव र सिकाइ अन्तर्राष्ट्रिय समुदायलाई बाँड्ने । सिकाइ साटासाट गर्ने । त्यसका साथै हामीले प्राप्त गरेका अनुभव हाम्रो भावी पुस्ताका निम्ति डकुमेन्टेसन गरेर छाड्ने, जसले गर्दा भोलिका दिनमा यस्ता खालका बिपत् आउँदाखेरि कसरी काम गर्दा उपयुक्त हुन सक्दो रहेछ । कहाँ कमजोरी भयो ? कहाँ राम्रो गर्न सक्यौँ ? के कुरामा सुधार गर्नुपर्ने होला ? यी सबै कुराको बारेमा बताउन सकौँ’ उहाँले भन्नुभयो– ‘अर्को, भोलिका दिनमा नेपाललाई सबै प्रकारका बिपत्बाट सुरक्षित कसरी बनाउने ? त्यसको निम्ति हाम्रो रोडम्याप के हुन सक्छ ? हाम्रो मार्गचित्र के हो ? हाम्रो कार्यक्रम के हो ? यसबारेमा पनि हामीले त्यो कार्यक्रममा प्रस्तुत गर्ने ।’
प्राधिकरणले सम्मेलनमा सहभागी हुन इच्छुकलाई अनलाइनमार्फत् रजिस्ट्रेसन गर्न अनुरोध गरेको छ भने सम्मेलनलाई लक्षित गरी “आइसिएनआर डट एनआरए डट जिओभी डट एनपी” नामको वेबसाइट पनि सार्वजनिक गरेको छ ।
