दाङ । राष्ट्रिय जनमोर्चा दाङले “गणतन्त्र र राष्ट्रिय स्वाधीनताको रक्षा गरौँ, सङ्घीयताको विरोध गरौँ” मूल नाराका साथ आगामी असोज १० गतेदेखि १९ गतेसम्म विरोधसभा सम्पन्न गर्ने भएको छ ।
२०७८ असोज ७ गते राजमो दाङको बैठकले यस्तो निर्णय गरेको हो ।
बैठकपछि जिल्लाध्यक्ष गणेश आचार्यले जारी गर्नुभएको प्रेसविज्ञप्तिमा असोज १० गते जिल्लास्तरको विरोधसभा आयोजना गरिने बताइएको छ । त्यसैगरी असोज ११ देखि १९ गतेसम्म पालिकास्तरमा विरोध सभा गर्ने निर्णय गर्दै त्यसका लागि वक्तासमेत ठेगान गरेको छ ।
कार्यतालिकामा राप्तीमा असोज १२ गते र तुलसीपुरमा असोज १४ गते आयोजित विरोधसभा राजमो केन्द्रीय कार्यकारी अध्यक्ष रश्मिराज नेपालीले, लमही र बबईमा असोज १३ गते तथा बङ्गलाचुलीमा असोज १७ गते आयोजित विरोधसभामा जिल्लाध्यक्ष गणेश आचार्यले, सोही दिन घोराहीमा आयोजित विरोधसभामा जिल्ला सचिवालय सदस्य शुक्र भण्डारीले, राजपुरमा असोज १५ गते आयोजित विरोधसभामा अखिल नेपाल युवक सङ्घका पूर्व अध्यक्ष काशीनाथ पोखरेलले र सोही दिन गढवामा आयोजित विरोधसभालाई राजमो लुम्बिनी प्रदेश समितिका सदस्य रेशम बिसीले सम्बोधन गर्ने उल्लेख छ ।
प्रेसवक्तव्यमा राप्ती गाउँपालिकाका केही बस्तीलाई सरकारले वनक्षेत्रको जग्गाको नाममा हटाउन थालेको त्यसको विरोध गर्दै उचित क्षतिपूर्तिसहित वैकल्पिक व्यवस्थाको माग गरेको छ ।
त्यस्तै, चाडपर्वको बेलामा हुने महङ्गी र कालोबजारी रोक्न पनि सरोकारवाला निकायले ध्यान दिनुपर्ने आवश्यकतामा जोड दिइएको छ ।
