जुमान सिंह केसी, प्युठान ।
कम्युनिष्ट नेता खगुलाल गुरुङ १०४ वर्षमा प्रवेश गर्नुभएको छ । विसं १९७५ साल भदौ २५ गते प्युठानको खारामा जन्मनुभएका गुरुङ नेपालका कम्युनिष्ट नेताहरुमध्ये उमेरमा सबैभन्दा पाका हुनुहुन्छ ।
खगुलाल गुरुङको १०४ औँ जन्मोत्सवका अवसरमा शुक्रबार एक कार्यक्रम गरी उहाँप्रति सम्मान प्रकट गरिएको छ । राष्ट्रिय जनमोर्चा गौमुखी गाउँपालिकाको आयोजनामा भएको सम्मान समारोहमा गुरुङलाई अविर, फूल र खादा लागाएर सु–स्वास्थ्य तथा दिर्घायुको कामना गरियो ।
प्युठानमा नेपाल कम्युनिष्ट पार्टीका संस्थापक सदस्य तथा मुक्ति सेनाका कमान्डर गुरुङ कम्युनिष्ट आन्दोलनका निष्ठावान नेताका रुपमा परिचित हुनुहुन्छ । उहाँकै नेतृत्वमा मुक्तिसेनाले सल्यान कब्जा गरेको थियो ।
१०४ औँ जन्मोत्सव समारोहमा नेकपा (मसाल) प्युठानका प्रवक्ता ज्ञामुराम न्यौपानेले जन्मोत्सवको शुभकामना दिँदै गुरुङले देखाएको बाटोमा पार्टी निरन्तर लाग्ने भन्दै उहाँको प्रेरणा र हौसलाले काम गर्न उर्जा मिल्ने गरेको बताउनु भयो । गुरुङ पन्चायतकाल भन्दा अघिदेखि नै जनताको पक्षमा खरो रुपमा प्रस्तुत हुँदै आएको इतिहास रहेको बताउनु भयो ।
साथै उहाँले प्युठानमा चलेको किसान आन्दोलनमा उहाँको महत्त्वपूर्ण भूमिकाको बारेमा समेत चर्चा गर्नु भएको थियो । पार्टी स्थापना कालदेखि थुप्रै जेल, नेल तथा कठिन अवस्थामा पनि लगातार पार्टी र जनाताको न्यायपूर्ण आन्दोलनमा उहाँको सक्रियता रहँदै आएको थियो ।
गुरुङ नेकपा (मसाल)का महामन्त्री मोहनविक्रम सिंहसँगै काम गर्नु भएको एक पुराना नेता हुनुहुन्छ ।
गुरुङको जन्मोत्सव समारोहमा पार्टीका स्थानीय नेता, कार्यकर्ता तथा सुभ चिन्तकहरुको सहभागिता रहेको थियो । कार्यक्रमको सन्चालन ज्ञान बहादुर कुँवर र अध्यक्षता राष्टिय जनमोर्चा नारिकोटका अध्यक्ष चन्द्र बहादुर केएमले गर्नु भएको थियो ।
