काठमाडौं । मोहन वैद्य नेतृत्वको नेकपा (क्रान्तिकारी माओवादी) ले सुदूरपश्चिममा राष्ट्रिय जनमोर्चाबाट निष्काशित व्यक्तिहरुसँग संयुक्त कार्यक्रम गर्नु कमजोरी भएको स्वीकार गरेको छ । देशभक्त जनगणतान्त्रिक मोर्चा (देजमो) का अध्यक्ष सिपी गजुरेलले सुदूरपश्चिममा भएको कमजोरी सच्याएर २२ दलीय मोर्चा कायम राख्ने बताउनुभएको छ ।

हिजो (२३ भदौ) कैलालीको अत्तरियामा नेकपा (क्रान्तिकारी माओवादी), विप्लव नेतृत्वको नेपाल कम्युनिष्ट पार्टी र नेकपा (माले) ले एमसीसीविरुद्ध संयुक्त कार्यक्रममा राष्ट्रिय जनमोर्चाबाट निष्काशित व्यक्तिहरुलाई समेत सामेल गरेका थिए ।

सो विषयमा राजमो सुदूरपश्चिमका अध्यक्ष नन्दराज भट्टले आफ्नो पार्टीको आन्तरिक मामिलामा वैद्य र विप्लव नेतृत्वले खेल्न खोजेको आरोप लगाउनुभएको थियो । देजमो अध्यक्ष जगुरेलले भने स्थानीयस्तरमा समन्वयको अभावले समस्या आएको भन्दै त्यस्ता कमजोरी फेरि दोहोरिन नदिने उल्लेख गर्नुभयो ।

यो पनिः पार्टीको आन्तरिक मामिलामा नखेल्न वैद्य, विप्लवलाई राजमो प्रदेश अध्यक्ष भट्टको ‘सुझाव’

बिहीबार युगदर्शनसँग कुरा गर्दै देजमो अध्यक्ष गजुरेलले सुदूरपश्चिममा स्थानीय समितिबाट कमजोरी भएको र अब त्यसलाई सच्याएर अघि बढ्ने बताउनुभयो ।

‘२२ दलीय मोर्चामा नेकपा (मसाल) र राष्ट्रिय जनमोर्चा पनि छ । हामीले एमसीसीलगायत राष्ट्रियताका विषयमा देशभर निरन्तर सहकार्य गरेका छौँ’ उहाँले भन्नुभयो, ‘सुदूरपश्चिममा हिजो साथीहरुबाट कमजोरी भएको छ । हाम्रैबीचमा समन्वय नहुँदा त्यस्तो भएको हो । त्यो कमजोरी सच्याउनुपर्छ ।’

नेता गजुरेलले केन्द्रीय तहमा पार्टीहरुबीच समझदारी कायमै रहेकाले कुनै एक ठाउँको कारणले २२ दलीय मोर्चामा समस्या नआउने विश्वास व्यक्त गर्नुभयो ।

उहाँले भन्नुभयो, ‘एमसीसीविरुद्ध अझ सशक्त ढंगले अघि बढ्नुपर्ने अवस्था छ । २२ दलीय मोर्चाका बीचमा केन्द्रमा भएको समझदारी अनुसार नै हामी अघि बढ्छौं । कुनै एक ठाउँको कारणले हाम्रोबीचमा समस्या आउँदैन ।’

अध्यक्ष गजुरेलले एमसीसीलाई संसदमा टेबुल नै हुन दिन नहुने बताउनुभयो । संसदबाहिरबाट त्यसको सशक्त प्रतिवाद गर्ने र सांसदहरुलाई पनि त्यहाँ भित्रबाट विरोध गर्न आग्रह गरिने उहाँले बताउनुभयो । संसदमा टेबुल भए एमसीसी पास हुनसक्ने उहाँको आशंक थियो ।

‘राजनीतिक रुपमा त एमाले र कांग्रेस धेरै टाढा पुगेका छन्, तर मालिक एउटै भएकोले उनीहरुलाई एकैठाउँमा मिलाइदिन सक्छ’ गजुरेलले भन्नुभयो, ‘संसदमा एमसीसी टेबुल भए त्यो पास हुन सक्छ । त्यसकारण टेबुल नै हुन नदिने प्रयास गर्नुपर्छ ।’

यो पनिः एमसीसी विरुद्ध संघर्षका लागि तयार रहन २२ दलीय मोर्चाको आह्वान