काठमाडौँ । अखिल नेपाल प्रगतिशील लेखक सङ्घ (अन्पा) ले वरिष्ठ प्रगतिवादी साहित्यकार तथा प्रगतिशील लेखक सङ्घका पूर्व अध्यक्ष आनन्ददेव भट्टप्रति श्रद्धाञ्जली व्यक्त गरेको छ ।
अध्यक्ष डा. गोविन्द आचार्यको हस्ताक्षरमा २०७८ भदौ १४ गते नै शोकवक्तव्य जारी गर्दै अन्पाले भट्टप्रति श्रद्धाञ्जली तथा शोकसन्तप्त परिवारप्रति गहिरो समवेदना प्रकट गरेको हो ।
अत्यन्तै सुरुचिपूर्ण शैलीमा प्रगतिवादी साहित्य रचना गर्ने तथा प्रगतिवादी विचारमा अडिग व्यक्तित्वको रूपमा भट्टलाई लिइएको सो शोकवक्तव्यको पूर्ण पाठ यस्तो छ–
“प्रगतिशील लेखक सङ्घका पूर्व अध्यक्ष, वरिष्ठ प्रगतिवादी साहित्यकार तथा चिन्तक आनन्ददेव भट्टको निधन भएको खबरले हामी अत्यन्त दुखित भएका छौँ । हाम्रो सङ्गठन उहाँको निधनप्रति भावपूर्ण श्रद्धाञ्ली अर्पण गर्दछ । त्यसका साथै शोकसन्तप्त परिवारजनप्रति गहिरो समवेदना प्रकट गर्दछ ।
आनन्ददेव भट्टले साहित्यका सबैजसो विधामा कलम चलाउनुभएको थियो । अत्यन्त सुरुचिपूर्ण शैलीमा उहाँले प्रगतिशील साहित्य सृजना गर्नुभएको थियो । त्यति मात्र होइन, उहाँले विचारको क्षेत्रमा प्रष्ट रूपमा प्रगतिवादी विचार राख्नुहुन्थ्यो । उहाँको निधनले प्रगतिवादी साहित्यिक आन्दोलनमा अपूरणीय क्षति पुगेको छ ।
अन्तमा, हामी पुनः उहाँप्रति भावपूर्ण श्रद्धाञ्जली व्यक्त गर्न चाहान्छौँ ।”
