काठमाडौं । राष्ट्रिय जनमोर्चाका इमान्दार कार्यकर्तारूलाई फुटपरस्त तत्वहरूले कसरी झुक्याएर धनगढीको कथित भेलामा लगेका रहेछन् भन्ने कुराको सहभागी आफैँले पर्दाफास गरिरहेका छन् ।
माओवादी केन्द्रसँग ‘वार्गेनिङ’ का लागि ठूलो समूह देखाउन धनगढीमा भेला गरेको अराजक समूहले ‘राष्ट्रिय जनमोर्चाको भेला छ’ भनेर कार्यकर्तालाई झुक्यानमा पारेको पाइएको छ । त्यसो त सो समूहले राष्ट्रिय जनमोर्चाकै नाममा भेला गरेर कार्यकर्ताको आँखामा छारो हालेको थियो ।
उनीहरूको झुठ सामुन्नेमा आएपछि इमान्दार नेता कार्यकर्ताले धमाधम सो गुटबाट आफूहरू अलग भएको र फुटपरस्त प्रवृतिलाई निस्तेज पार्ने बताएका छन् ।
राष्ट्रिय जनमोर्चाका पुराना नेता तथा कैलाली जिल्ला सदस्य शंकर सोवले आफूलाई पार्टीको भेला भनी भुक्याएर लगिएको र कथित प्रदेश समितिको सल्लाहकारमा राखिएका बताउनुभयो । उहाँले शनिबार विज्ञप्ति प्रकाशित गरी फुटपरस्त तत्वसँग आफ्नो कुनै साइनो नरहेको स्पष्ट पार्नुभएको छ।
यस्तै, राष्ट्रिय जनमोर्चाका कैलाली जिल्ला सदस्य सुरेन्द्र ताडी र टिकाराम नेपालीले पनि भेलामा झुक्याएर लगिएको बताउनुभएको छ । सो भेला पार्टीको आधिकारिक नभएको स्पष्ट भएपछि आफूहरु फुटपरस्त तत्वको कमिटिमा बस्न नचाहेको उहाँहरुले विज्ञप्तिमा उल्लेख गर्नुभएको छ। सो समूहले नेपालीलाई आफ्नो गुटको कैलाली जिल्ला सल्लाहकार र ताडीलाई जिल्ला सदस्य बनाएका थिए ।
यस्तै, राजमो डोटी जिल्ला सदस्य मानबहादुर खड्काले आफूलाई अपहरणको शैलीमा भेलामा लगेर प्रदेश समितिको सदस्य बनाएको बताउनु भएको छ ।
‘पार्टीको भेला छ जानुपर्छ भनेर अपहरणकै शैलीमा जबर्जस्ती गरे’ उहाँले भन्नुभयो, ‘मेरो इच्छाबेगर प्रदेश समितिमा राखे ।’
यस्तै, राजमो कैलाली जिल्ला सदस्य राजबहादुर तिरुवा,मनकुमारी सोब र रत्न सञ्ज्याललगायतले पनि आफूहरुलाई झुक्याएर भेलामा लगेको स्पष्ट पारिसक्नुभएको छ ।
यसअघि हिजै विज्ञप्ति प्रकाशित गरी अखिल (छैठौं) का केन्द्रीय सदस्य डबल तिरुवाले आफू हाल पञ्जावमा रहेको र यता फुटपरस्त तत्वहरूले आफूलाई समेत कथित समितिमा राखेको बताउनुभएको छ ।
कैलालीका नगर समितिहरू फुटपरस्तको विरोधमा
यता, कैलाली जिल्ला समिति अन्तर्गत राष्ट्रिय जनमोर्चाका स्थानीय समितिहरूले फुटपरस्त प्रवृतिको विरोध गरेका छन् ।
टिकापुर नगर समिति, लम्की गाउँ समिति, धनगढी नगर समितिले शनिबार विज्ञप्ति प्रकाशित गरी फुटपरस्त तत्वहरूको भ्रममा नपर्न आम कार्यकर्तासँग आग्रह गरेका छन् ।
यसअघि राजमो सुदूरपश्चिमका सबै जिल्ला समिति तथा जनवर्गीय संगठनहरूले फुटपरस्त तत्वको विपक्षमा आफूलाई उभ्याएका थिए ।
यो पनिः
कथित धनगढी भेलाका अगुवाको माओवादीसँग ‘वार्गेनिङ’
राजबहादुर तिरुवा, मनकुमारी सोब र रत्न सन्ज्यालले भने– ‘हामीलाई झुक्याइयो’
फुटपरस्त तत्त्वहरू गुटबन्दीमार्फत पार्टी कब्जा गर्न चाहान्छन् : मोहनविक्रम सिंह
