काठमाडौँ । राष्ट्रिय जनमोर्चाका सदस्य राजबहादुर तिरुवाले फुटपरस्त तत्त्वहरूले आफूलाई झुक्याएको बताउनुभएको छ ।
उहाँले भन्नुभयो– ‘पार्टीको प्रदेश भेला छ भनेर मलाई बोलाइयो । त्यसैले म धनगढी भेलामा गएको थिएँ ।’
तिरुवाले आफूलाई यथार्थ जानकारी नदिइकन प्रदेश समितिको सदस्यमा राखेकोमा आपत्ति जनाउनुभएको छ ।
उहाँले भन्नुभयो– ‘म चित्रबहादुर केसीको नेतृत्व रहेको राष्ट्रिय जनमोर्चाको संस्थापन पक्षतिरै छु ।’
यता, राजमो कैलालीका सदस्य मनकुमारी सोबले पनि आफूलाई थाहै नदिई फुटपरस्त तत्त्वहरूले कैलाली जिल्ला समितिको सदस्यमा राखेको बताउनुभयो ।
‘मसित सल्लाहै नगरी कैलाली जिल्ला समितिमा राखिएछ’ उहाँले भन्नुभयो– ‘सञ्चार माध्यममा खबर आएपछि हामीले थाहा पायौँ ।’
उहाँले आफू चित्रबहादुर केसी नेतृत्वको राजमोतिरै भएको बताउनुभयो ।
त्यस्तै, राजमो सदस्य रत्न सञ्ज्यालले पनि प्रेसवक्तव्य नै प्रकाशित गरेर आफू फुटपरस्त तत्त्वको पक्षमा नरहेको बताउनुभयो ।
भदौ ११ गते जारी प्रेसवक्तव्यमा उहाँले आफू राजमो कैलालीको सम्मेलनद्वारा निर्वाचित जिल्ला सदस्य भएकाले जिल्लाध्यक्ष दयाराम
सञ्ज्याल र प्रदेश अध्यक्ष नन्दराज भट्ट नेतृत्वको राजमोमा रहेको बताउनुभएको छ ।
राजमोका केही अनुशासनविहीन तथा फुटपरस्त तत्त्वहरूले गत भदौ ८ र ९ गते कैलालीको धनगढीमा भेला गरेका थिए । त्यसमा राजबहादुर तिरुवालाई झुक्याएर बोलाइएको थियो भने मनकुमारी सोब र रत्न सञ्ज्याल सो भेलामा अनुपस्थित हुनुहुन्थ्यो ।
