काठमाडौं । जनता समाजवादी पार्टीको आधिकारिकता उपेन्द्र यादव पक्षले पाएसँगै संकटको परेको लुम्बिनी सरकार परिवर्तन हुने भएको छ । यसअघि नै अल्पमतमा परेका कारण अविश्वासको प्रस्ताव छल्न उही दिन राजीनामा दिएर पुनः नयाँ नियुक्ति लिएका मुख्यमन्त्री शंकर पोखरेल जसपाको आधिकारिकता विवाद टुंगिएपछि संकटमा पर्नुभएको छ ।
लुम्बिनी प्रदेशसभामा जसपाका ६ जना सांसदमध्ये ३ जना सत्ता पक्षतिर ३ जना विपक्षी गठबन्धनतिर लागेका थिए । पार्टीले उनीहरुमाथि कारवाही गरेपछि मुख्यमन्त्री शंकर पोखरेललाई संकट परेको हो ।
जसपाले हिजो (मंगलबार) सरकारमा सहभागी आफ्ना तीन सांसदलाई कारबाही गरेको थियो । पार्टीको ह्वीप उल्लंघन गरेको आरोप लागेका लुम्बिनी प्रदेश सरकारका भौतिक पूर्वाधार विकास मन्त्री सन्तोष कुमार पाण्डेय, भूमि व्यवस्था, कृषि तथा सहकारी मन्त्री विजयबहादुर यादव र उद्योग, वन तथा वातावरण मन्त्री कल्पना पाण्डेलाई जसपाले पार्टीबाट निष्काशन गरेको छ ।
लुम्बिनी सरकारमा मन्त्री बनेका तीन नेता जसपाबाट निष्कासित
लुम्बिनी प्रदेशमा नेपाली कांग्रेस, नेकपा माओवादी केन्द्र, जसपा नेपाल र राष्ट्रिय जनमोर्चाको गठबन्धनले मुख्यमन्त्री पोखरेललाई हटाउन लामो समयदेखि पहल गर्दै आएको भए पनि विभिन्न बहानामा पोखरेलले सत्ताको आयु लम्ब्याउँदै आउनुभएको थियो ।
लुम्बिनी प्रदेशसभामा हाल ८३ सदस्य छन् । यसमा बहुमतका लागि कम्तीमा ४२ सांसदको समर्थन आवश्यक हुन्छ । जसपाका तीन जना मन्त्रीलाई कारबाही गरेपछि प्रदेशसभामा कुल सांसद संख्या ८० भएको छ ।
यो अवस्थामा बहुमतका लागि कम्तीमा ४१ सांसदको समर्थन आवश्यक हुन्छ । लुम्बिनी प्रदेशमा एमालेका ३८ सांसदमात्र छन् । बाँकी सांसद विपक्षी गठबन्धनतिर भएकाले विपक्षी गठबन्धनमा स्पष्ट बहुमत देखिएको छ ।
